எங்கும் அன்பை விதைப்போம்

-பவித்ரா நந்தகுமார்,
-----------
ஒரு சிலரின் வாழ்க்கை பூந்தோட்டமாகவும் ஒரு சிலரின் வாழ்க்கை
முட்செடிகள் நிரம்பியதாகவும் இருக்க நம் கர்மா, பூர்வ புண்ணிய
பலன்கள், பெற்றோர்களின் ஆசி, என பல காரணங்கள் சொல்லப்
பட்டாலும் ஒரு மனிதனுடைய எண்ணங்கள், நம்பிக்கைகள்
அழகானால் வாழ்க்கையும் சிறப்பானதாக மாறிவிடும்.

உதாரணமாக “நான் ஆரோக்கியமாக இருக்கிறேன், மகிழ்ச்சியாக
இருக்கிறேன்” என ஒரு தண்ணீர் குவளையின் முன் சொல்லி வந்து,
”நான் கவலையாக உணர்கிறேன்,பலவீனமாகி விட்டேன்” போன்ற
எதிர்மறையான வார்த்தைகளை மற்றொரு தண்ணீர் குவளையின்
முன் தொடர்ந்து வெளிப்படுத்தி பின் அந்த இரு குவளைகளையும்
நுண்ணோக்கி மூலம் ஆய்வுக்கு உட்படுத்திப் பார்க்கும் போது
நேர்மறை வார்த்தைகள் சொல்லப்பட்ட நீர் குவளையில் அழகான
வடிவமைப்பும் எதிர்மறை சொற்கள் நிரம்பிய குவளையில் இருந்த
நீரின் வடிவமைப்பு காண சகிக்காததாகவும் இருந்ததாக எமட்டோ
என்னும் ஆய்வாளர் நிரூபித்திருக்கிறார்.

சக்தி நிறைந்த வார்த்தைகள்

நம் மண்ணில் இருந்த ஆன்மிக பெரியவர்கள் இதே கருத்தை
சொல்லியிருக்கிறார்கள். எதிரே ஒரு குவளை நீரை வைத்து விட்டு
சண்முக கவசத்தை பாராயணம் செய்து, படித்து முடித்ததும் அந்த
நீரை எடுத்து பருகிவந்தால் அந்த மந்திரச் சொற்கள் கவசம் போல்
இருந்து நம் உடலை பாதுகாக்கும் என்பது அவர்களின் அறிவுரை..
எண்ணங்கள் மட்டுமல்ல நாம் உதிர்க்கும் வார்த்தைகள் கூட
எண்ணற்ற சக்தி நிறைந்தவை.

வார்த்தைகளின் தாக்கம் இந்த உலகம் முழுதிலும் நிறைந்து
கிடைக்கிறது. நாம் உதிர்க்கும் வார்த்தைகளே நம்
பிரதிபலிப்பாக அனைவர் கண்முன்னும் நிற்கிறது. ஆக,
வாழ்க்கை குறித்து இதுவரை எதிர்மறையாக அணுகியிருந்த
பார்வையை இந்த புத்தாண்டில் மாற்றிப் போடுவோம்.

அனைத்தையும் அன்பு சார்ந்து யோசித்தாலே இந்த உலகமும்
அதே அன்புடன் நம்மை அரவணைக்கும்.

'இன்ஸ்டிடியூட் ஆப் ஹார்ட்மாத் பவுண்டேஷன்' எனும் ஒரு
அமைப்பு அமெரிக்காவில் நடத்திய ஒரு ஆராய்ச்சியில்
மனிதனின் இதயத்திலிருந்து வெளியாகும் மின்காந்தசக்திக்கு
மிக அதிக ஆற்றல் இருப்பதாக சொல்லியுள்ளது.

தன்னிடமிருந்து 24 அடி தூரத்திற்கு, அது நுண்அணுக்கள்
அளவில் மாற்றத்தை ஏற்படுத்துவதாக ஆய்வில் தெரிவித்துள்ளது.
அன்பு சார்ந்த உணர்வுகளை வெளிப்படுத்துவது அதே அன்புசார்ந்த
உணர்வுகளை ஈர்த்துக் கொண்டும் வருவதாக சொல்கிறது.
-
நன்றி
எங்கும் அன்பை விதைப்போம்-கட்டுரையிலிருந்து -தினமலர்