இந்தியாவுக்கு '100'வது வெற்றி; கோஹ்லி, ரிஷாப் அரைசதம்

-





கோல்கட்டா:
இரண்டாவது 'டி-20' போட்டியில் அசத்திய இந்திய அணி 8 ரன்
வித்தியாசத்தில் வென்றது. இது 'டி-20' அரங்கில் 100வது வெற்றியாக
அமைந்தது. தொடரை 2-0 என கைப்பற்றியது.

இந்தியா வந்துள்ள விண்டீஸ் அணி மூன்று போட்டிகள் கொண்ட
'டி-20' தொடரில் பங்கேற்கிறது. முதல் போட்டியில் வென்ற இந்தியா
1-0 என தொடரில் முன்னிலையில் இருந்தது. இரு அணிகள் மோதிய
இரண்டாவது போட்டி கோல்கட்டா ஈடன் கார்டன் மைதானத்தில்
நடந்தது. 'டாஸ்' வென்ற விண்டீஸ் கேப்டன் போலார்டு பீல்டிங் தேர்வு
செய்தார்.

கோஹ்லி அபாரம்

இந்திய அணிக்கு கேப்டன் ரோகித் சர்மா, இஷான் கிஷான்(2) ஜோடி
மோசமான துவக்கம் கொடுத்தது. ரொமாரியோ வீசிய போட்டியின்
6வது ஓவரில் கோஹ்லி இரு பவுண்டரி அடிக்க, ரோகித் தன்பங்கிற்கு
சிக்சர் விளாசினார்.

இந்த ஓவரில் 15 ரன் கிடைக்க, இந்திய அணி 6.1 ஓவரில் 50 ரன்களை
கடந்தது. இரண்டாவது விக்கெட்டுக்கு 49 ரன் சேர்த்த போது, ராஸ்டன்
சேஸ் 'சுழலில்' சிக்சருக்கு ஆசைப்பட்ட ரோகித் (19) அவுட்டானார்.
கோஹ்லி, சூர்யகுமார் இணைந்தனர்.

தான் சந்தித்த முதல் பந்தை பவுண்டரிக்கு அனுப்பி, ரன் கணக்கைத்
துவக்கினார் சூர்யகுமார். துரதிருஷ்டவசமாக 8 ரன் மட்டும் எடுத்த
இவர், சேஸ் பந்தில் அவரிடமே 'கேட்ச்' கொடுக்க இந்திய
அணி 10 ஓவரில் 76/3 ரன் எடுத்தது.

'சூப்பர்' ஜோடி

சேஸ் பந்தில் சிக்சர் அடித்த கோஹ்லி, சர்வதேச 'டி-20' அரங்கில் 30 வது
அரைசதம் அடித்தார். அடுத்த 2வது பந்தில் கோஹ்லி (52) போல்டாகி
அதிர்ச்சி கொடுத்தார். ரிஷாப் பன்ட், வெங்கடேஷ் இணைந்து ரன்
குவிப்பை வெளிப்படுத்தினர். 5வது விக்கெட்டுக்கு 35 பந்தில் 76 ரன்கள்
குவித்த நிலையில் வெங்கடேஷ் (33) போல்டானார்.

மனம் தளராத ரிஷாப், 'டி-20' அரங்கில் 3வது அரைசதம் கடந்தார்.
இந்திய அணி 20 ஓவரில் 5 விக்கெட்டுக்கு 186 ரன் எடுத்தது. ரிஷாப் (52),
ஹர்ஷல் (1) அவுட்டாகாமல் இருந்தனர்.விண்டீஸ் சார்பில் சேஸ்
அதிகபட்சம் 3 விக்கெட் சாய்த்தார். பூரன் ஆறுதல் கடின இலக்கைத்
துரத்திய விண்டீஸ் அணியை மேயர்ஸ் (9), பிரண்டன் கிங் (22)
கைவிட்டனர்.

பாவெல், நிகோலஸ் பூரன் இணைந்து வேகமாக ரன் சேர்த்தனர்.
39 ரன்னில் பாவெல் கொடுத்த 'கேட்ச்சை' புவனேஷ்வர் நழுவ விட,
பதட்டம் ஏற்பட்டது. 3வது விக்கெட்டுக்கு 100 ரன் சேர்த்த போது பூரன் (62) அவுட்டானார்.

கடைசி ஓவரில் விண்டீஸ் வெற்றிக்கு 25 ரன் தேவைப்பட்டன.
ஹர்ஷல் பந்து வீசினார். முதல் 2 பந்தில் 2 ரன் எடுக்கப்பட்டன.

3, 4வது பந்தில் பாவெல், சிக்சர் அடிக்க இந்திய ரசிகர்களுக்கு
'டென்ஷன்' ஏற்பட்டது. கடைசி 2 பந்தில் 11 ரன் தேவைப்பட்டன.
சுதாரித்துக் கொண்ட ஹர்ஷல், 2 பந்தையும் துல்லியமாக வீச,
1 ரன் மட்டும் எடுக்கப்பட்டன. விண்டீஸ் அணி 20 ஓவரில்
3 விக்கெட்டுக்கு 178 ரன் மட்டும் எடுத்து தோல்வி அடைந்தது.

பாவெல் (68), போலார்டு (3) அவுட்டாகாமல் இருந்தனர்.

தினமலர்