வரி செலுத்துபவர்கள் கவனிக்க வேண்டிய மாற்றங்கள்

வருமான வரி தொடர்பாக மனதில் கொள்ள வேண்டிய
முக்கிய மாற்றங்கள் மத்திய பட்ஜெட்டில் இடம்
பெற்றுள்ளன.

பரவலாக எதிர்பார்க்கப்பட்டது போல, மத்திய பட்ஜெட்டில்
வருமான வரிச்சலுகை எதுவும் அறிவிக்கப்படவில்லை
என்றாலும், வரி செலுத்துபவர்கள் கவனத்தில் கொள்ள
வேண்டிய முக்கிய அறிவிப்புகள் சில இடம்பெற்றுள்ளன.

இந்த அறிவிப்புகள் வரி தாக்கல் செயல்முறையை மேலும்
சீராக்கும் வகையில் அமைந்திருப்பதாக கருதப்படுவதோடு,
வரி செலுத்துபவர்களுக்கு நிவாரணம் அளிக்கும் வகையிலும்
அமைந்துள்ளது.

வரித்தாக்கலில் செய்த தவறுகளை சரி செய்யும் வாய்ப்பு,
மாநில அரசு ஊழியர்களுக்கான அதிக கழிவு
உள்ளிட்டவையாக இந்த அம்சங்கள் அமைகின்றன.

வரித்தாக்கல்

வருமான வரித்தாக்கலை புதுப்பிக்கும் வசதியை வருமான
வரித்துறை அமல் செய்ய உள்ளது. தற்போது, தாமதமான
வரித்தாக்கல் அல்லது திருத்தத்தை, நிதியாண்டை தொடர்ந்து
வரும் டிசம்பர் 31ம் தேதிக்குள் மேற்கொள்ள வேண்டும்.

இதன் காரணமாக திருத்தங்களை மேற்கொள்ள குறைவான
அவகாசமே உள்ளது. மேலும், அனைத்து வருமானங்களையும்
சுட்டிக்காட்டும் ஆண்டு தகவல் அறிக்கை வசதியும் வருமான
வரித்துறையால் அறிமுகம் செய்யப்பட்டுள்ள நிலையில்,
வருமானம் விடுபடல் தொடர்பாக ஒருவித அச்சம் நிலவுகிறது.

இந்நிலையில், வருமான வரி தகவல்களை புதுப்பித்து தாக்கல்
செய்ய கூடுதல் அவகாசம் அளிக்கப்பட உள்ளது.புதிய
முறையின் படி, புதுப்பிக்கப்பட்ட வரித்தாக்கலை இரண்டு
ஆண்டுகளுக்குள் மேற்கொள்ளலாம்.

வருமானம் தொடர்பான தகவல் அளிப்பதில் தவறு செய்து
விட்டதாக கருதுபவர்களுக்கு இந்த முறை உதவியாக இருக்கும்.
புதிய தகவல்களை அளிப்பவர்கள், அதற்கேற்ப கூடுதல் வரி
செலுத்தும் தேவையும் இருக்கும்.

வரித்தாக்கல் செயல்முறையை எளிதாக்குவதோடு, தாமாக
முன்வந்து முழுமையான தகவல்களை வரி செலுத்துபவர்கள்
அளிக்கவும் இது ஊக்குவிக்கும் என கருதப்படுகிறது. எனினும்,
தாமதமாக வரித்தாக்கல் செய்யும் போது, பாதிப்பை
ஏற்படுத்தும் அம்சங்களையும் மனதில் கொள்ள வேண்டும்.

கோவிட் நிவாரணம்

கோவிட் பாதிப்பு நிலவும் சூழலில், தனிநபர்கள் அல்லது குடும்ப
உறுப்பினர்களின் கோவிட் சிகிச்சைக்காக குடும்ப உறுப்பினர்கள்
அல்லது நிறுவனத்திடம் இருந்து பெறும் தொகை வரிச்சலுகைக்கு
உரியதாக குறிப்பிடப்பட்டுள்ளது.
ஊழியர் மரணம் அடைந்தால் கிடைக்கும் தொகைக்கும் இது
பொருந்தும்.

பனிரெண்டு மாதங்களுக்குள் இந்த தொகை கிடைக்கும் போது
இந்த சலுகை பொருந்தும். இதே போல, மாற்று
த்திறனாளிகளுக்காக பெற்றோர் அல்லது பாதுகாவலர் எடுக்கும்
காப்பீடு தொடர்பாகவும் சலுகை அறிவிக்கப்பட்டுள்ளது.

பெற்றோர் மரணம் அல்லது அறுபது வயதாகும் போது
ஆண்டளிப்பு வழங்கும் திட்டத்திற்கு சலுகை பொருந்தும்
வகையில் திருத்தம் கொண்டு வரப்பட உள்ளது.

நிதிச்சொத்துகள் மீதான நீண்ட கால ஆதாய வரிக்கான கூடுதல்
வரிக்கான வரம்பு, 15 சதவீதமாக இருக்கும்என அறிவிக்கப்பட்டு
உள்ளது. முன்னதாக பங்குகள், மியூச்சுவல் பண்ட்களுக்கு மட்டும்
இருந்தது தற்போது அனைத்து நிதிச்சொத்துகளுக்கும்
விரிவாக்கப்பட்டுள்ளது.

தேசிய பென்ஷன் திட்டத்தில், வேலை வழங்குபவர் தரப்பில்
செலுத்தப்படும் பங்களிப்புக்கான கழிவு, 10 சதவீதத்தில் இருந்து
14 சதவீதமாக மாநில அரசு ஊழியர்களுக்கும் உயர்த்தப் பட்டு
உள்ளது.

மேலும், கிரிப்டோ நாணயம் வருமானம் மீது வரி விதிப்பு
அறிவிக்கப்பட்டுள்ளதால் வருமான வரி படிவத்தில் கிரிப்டோ
மற்றும் இதர டிஜிட்டல் சொத்துகள் தொடர்பான தகவல்களை
அளிக்க தனிப்பகுதியும் சேர்க்கப்பட உள்ளது.

தினமலர்