உடுமலை குளங்களில் தாமரைச்செடிகளை பாதுகாக்க வேண்டும் - கிராமமக்கள் கோரிக்கை

by **ayyasamy ram** Tue Jan 25, 2022 11:54 am

உடுமலை:

உடுமலை பகுதியில் பழமையான பாசனத்திட்டங்களில் ஒன்றாக
ஏழு குள பாசனத்திட்டம் உள்ளது. அடுக்குத்தொடராக அமைந்துள்ள
குளங்கள் வாயிலாக நேரடியாகவும், மறைமுகமாகவும் பல ஆயிரம்
ஏக்கர் நிலங்கள் பாசன வசதி பெறுகின்றன.

இதில் 67.49 ஏக்கர் பரப்பில் அமைந்துள்ள செட்டிக்குளம் தாமரை
மலர்களுக்கென தனிச்சிறப்பு பெற்றுள்ளது. களிமண் பரப்பில்
அமைந்துள்ள இக்குளத்தில் இயற்கையாக வளர்ந்த தாமரைச்
செடிகளை அப்பகுதி மக்கள் பாதுகாத்து வருகின்றனர்.

இதனால் குளத்தில் தண்ணீர் தேங்கியதும் நீர்த்தேக்க பரப்பு முழுவதும்
பசுமையாக மாறும் அளவுக்கு தாமரை செடிகளின் வளர்ச்சி இருக்கும்.

தண்ணீர் இருக்கும் போது தாமரை மலர்களை சேகரித்து கோவில்களுக்கு
அனுப்பி வைக்கின்றனர். அதே போல் நீர் மட்டம் குறைந்ததும் தாமரை
தண்டு மற்றும் கிழங்கு ஆகியவற்றை சேகரித்து விற்பனை செய்கின்றனர்.

சித்தா மற்றும் ஆயுர்வேத மருத்துவத்தில் பல்வேறு மருந்துகள்
தயாரிப்புக்கு தாமரையின் பாகங்கள் பயன்படுத்தப்படுகின்றன.

எனவே அப்பகுதி மக்களுக்கு வருவாயும் கிடைத்து வருகிறது. ஆனால்
ஏழு குள பாசன திட்டத்திலுள்ள சில குளங்களில் நேரடியாக கலக்கும்
கழிவுநீரால் செட்டிக்குளத்திலும் பாதிப்பு ஏற்படும் என மக்கள்
அச்சப்படுகின்றனர்.

இக்குளத்தில் கழிவு நீர் கலப்பதை தவிர்க்கவும் தாமரைச்செடிகளை
பாதுகாக்கவும் பொதுப்பணித்துறை நடவடிக்கை எடுக்க வேண்டும்.
பிற குளங்களிலும் தாமரை வளர்ப்பை அதிகரிக்க வேண்டும் என
கோரிக்கை விடுக்கப்பட்டுள்ளது.
-
-மாலைமலர்