ரபெல் நடால் சாம்பியன்: ஆஸி., ஓபனில் அபாரம்

மெல்போர்ன்:
ஆஸ்திரேலிய ஓபன் டென்னிஸ் ஒற்றையர் பிரிவில் ஸ்பெயினின்
ரபெல் நடால் சாம்பியன் பட்டம் வென்றார். பைனலில், ரஷ்யாவின்
மெட்வெடேவை தோற்கடித்தார்.

ஆஸ்திரேலியாவின் மெல்போர்ன் நகரில் நடப்பு ஆண்டின் முதல்
கிராண்ட்ஸ்லாம் தொடரான ஆஸ்திரேலிய ஓபன் டென்னிஸ் நடந்தது.
இதன் ஆண்கள் ஒற்றையர் பிரிவு பைனலில் உலகின் 'நம்பர்-5'
ஸ்பெயினின் ரபெல் நடால், 2வது இடத்தில் உள்ள ரஷ்யாவின்
டேனில் மெட்வெடேவ் மோதினர்.

முதலிரண்டு செட்களை மெட்வெடேவ் 6-2, 7-6 எனக் கைப்பற்றினார்.

பின் எழுச்சி கண்ட நடால், அடுத்த இரு செட்களை 6-4, 6-4 என தன்
வசப்படுத்தி பதிலடி தந்தார். வெற்றியாளரை நிர்ணயிக்கும் 5வது
செட்டில் மீண்டும் அசத்திய நடால் 7-5 என போராடி கைப்பற்றினார்.
ஐந்து மணி நேரம், 24 நிமிடம் நீடித்த போட்டியில் அசத்திய நடால்
2-6, 6-7, 6-4, 6-4, 7-5 என்ற கணக்கில் வெற்றி பெற்று சாம்பியன்
பட்டத்தை தட்டிச் சென்றார்.

ஆஸ்திரேலிய ஓபனில் 2வது முறையாக (2009, 2022) கோப்பை வென்ற
நடால், கிராண்ட்ஸ்லாம் அரங்கில் 21வது பட்டத்தை தட்டிச் சென்றார்.
இதன்மூலம் அதிக கிராண்ட்ஸ்லாம் பட்டம் வென்ற வீரர்கள் பட்டியலில்
செர்பியாவின் ஜோகோவிச், சுவிட்சர்லாந்தின் பெடரரை (தலா 20) முந்தி
முதலிடம் பிடித்தார்.

நடால், இதுவரை ஆஸ்திரேலிய ஓபனில் 2 (2009, 2022), பிரெஞ்ச் ஓபனில்
13 (2005-08, 2010-14, 2017-20), விம்பிள்டனில் 2 (2008, 2010), யு.எஸ்., ஓபனில் 4
(2010, 2013, 2017, 2019) என, 21 கிராண்ட்ஸ்லாம் வென்றுள்ளார்.

தினமலர்