ரயில் நிலையத்தில் எட்டு மாத குழந்தையுடன் ஓடும் ரயிலுக்கு அடியில் சிக்கிய பெண்

வேலூர் மாவட்ட காட்பாடி ரயில் நிலையத்தில் ஒரு பெண்மணி 8 மாத ஆண் குழந்தையுடன் ரயிலுக்காக காத்திருந்துள்ளார். திடீரென அவர் நடைமேடை மாறுவதற்காக நடைமேடையை பயன்படுத்தாமல் தண்டவாளத்தை கடக்க முயன்றுள்ளார். அப்போது கால் இடறி கீழே விழுந்ததில் தலையில் காயமடைந்து மயக்க நிலைக்கு சென்றுள்ளார்.

அந்த சமயத்தில் எர்ணாகுளத்தில் இருந்து பிலாஸ்பூர் செல்லும் சூப்பர் பாஸ்ட் எக்ஸ்பிரஸ் ரயில் பெண் விழுந்து கிடந்த தண்டவாளத்தில் சென்றுள்ளது. அப்போது அதிர்ச்சியடைந்த பொதுமக்கள் செய்வதறியாமல் தவித்தனர்.

பெண் மற்றும் குழந்தை ரயிலுக்கு அடியில் சிக்கிக்கொண்டதால் பெரிய அசம்பாவிதம் நேரிடுமோ என்ற அச்சத்தில் ரயில்வே போலீசார் மற்றும் பொதுமக்கள் பதற்றத்துடன் காத்திருந்தனர். அப்போது, நல்வாய்ப்பாக குழந்தை அழுதபடி அசையாமல் இருந்தது. இதனையடுத்து ரயில்வே போலீசார் விரைந்து வந்து குழந்தையும் தாயும் உயிருடன் மீட்டனர். குழந்தைக்கு காயங்கள் ஏதும் ஏற்படாத நிலையில் அக்குழந்தையின் தாயிக்கு மட்டும் தலையில் அடிபட்டதால் அவர் மயங்கிய நிலையில் உள்ளார்.
ரயில் கடந்துச்சென்ற பிறகு தண்டவாளத்தில் இறங்கி குழந்தை மற்றும் பெண்மணியை மீட்ட போலீசார் வேலூர் அரசு மருத்துவமனைக்கு சிகிச்சைக்காக அனுப்பி வைத்தனர். இதுகுறித்து பேசிய மூத்த காவல் அதிகாரி ஒருவர், எச்சரிக்கையை மீறி ரயில் தண்டவாளத்தில் குழந்தையுடன் நடந்துச்சென்ற பெண் தவறி கீழே விழுந்ததாகவும், பின்னர் பத்திரமாக மீட்டுள்ளதாகவும் கூறினார்.

மேலும், அந்த பெண்ணிடம் எவ்வித அடையாள அட்டையும் இல்லாததால் அவர் யார் எங்கிருந்து எங்கு செல்கிறார் என்ற விபரம் தெரியவில்லை எனவும் மயக்கம் தெளிந்த பிறகு விசாரணை நடத்தவுள்ளதாகவும் தெரிவித்தார்.
நன்றி சமயம்