ஒமைக்ரான் பரவல் -தமிழக சுகாதாரத் துறை அமைச்சர் மா. சுப்ரமணியன்

கொரோனா மூன்றாவது அலையும், உருமாற்றம் அடைந்த ஒமைக்ரான் வைரஸும் சேர்ந்து ஒட்டுமொத்த உலகையும் மீண்டும் வாட்டி வதைக்க தொடங்கியுள்ளது.

கொரோனா, ஒமைக்ரான் பரவலை கட்டுப்படுத்த லாக்டவுன் எனும் அஸ்திரத்தை மத்திய, மாநில அரசுகள் கையில் எடுத்துள்ளன. இந்த நிலையில், ஒமைக்ரான் தொற்று ஏற்பட்டுவிட்டால் அதிலிருந்து விடுபட ஒருவர் என்னென்ன வழிமுறைகளை கையாள வேண்டும் என்பது குறித்து தமிழக சுகாதாரத் துறை அமைச்சர் மா. சுப்ரமணியன் சட்டசபையில் அறிவுறுத்தியுள்ளார்.
நன்றி சமயம்
இதுதொடர்பாக அவையில் ஆளுநர் உரைக்கு நன்றி தெரிவிக்கும் தீர்மானத்தின் மீது நடைபெற்ற விவாதத்தில், எதிர்க்கட்சி தலைவர் எடப்பாடி பழனிசாமி பேசும்போது, " ஒமைக்ரான் எனும் புதிய வைரஸ் நாடு முழுவதும் தற்போது வேகமாக பரவி வருகிறது.

இதனால் மக்கள் அச்சம் அடைந்துள்ளனர். ஒமைக்ரான் பாதிப்பு பன்மடங்கு அதிகரித்து வருவதால், தொற்றுக்கு ஆளாவோருக்கு சிகிச்சையளிக்க போதிய படுக்கை வசதியை ஏற்படுத்த வேண்டும். தமிழகத்தில் 4 ஆயிரம் பேர் கொரோனாவால் பாதிக்கப்பட்டுள்ளனர். இதனை தடுக்கவும் அரசு நடவடிக்கை எடுக்க வேண்டும்.

தடுப்பூசி முதல் டோஸ் 87 சதவீதமும், இரண்டாவது டோஸ் 60 சதவீதமும் போடப்பட்டுள்ளது. முதல் டோஸ், இரண்டாவது டோஸுக்கான இடைவெளி 27 சதவீதமாக இருக்கிறது. எனவே, அனைவருக்கும் இரண்டாவது டோஸ் தடுப்பூசி போட வேண்டும்" என்று இபிஎஸ் வலியுறுத்தினார்.

எடப்பாடி பழனிசாமிக்கு பதிலளித்து அமைச்சர் மா.சுப்ரமணியன் பேசியது:

உலகம் முழுவதும் நேற்று மட்டும் புதிதாக 25. 40 லட்சம் பேருக்கு கொரோனா பாதிப்பு ஏற்பட்டுள்ளது. எதிர்காலத்தில் இந்த எண்ணிக்கை மேலும் உயர வாய்ப்புள்ளது. அதனால் மக்கள் அச்சப்படத் தேவையில்லை. மருத்துவமனைகளில் ஒரு லட்சம் படுக்கைகள் தயார் நிலையில் உள்ளன.
இருந்தாலும் ஒமைக்ரான் தொற்றுக்கு ஆளாவோர் 7 நாட்கள் வீட்டில் தனிமையில் இருந்தாலே போதும். மருத்துவமனையை நோக்கி மக்களை திருப்பிவிட வேண்டாம். தமிழக மக்கள் மத்தியில் பதற்றத்தை ஏற்படுத்த வேண்டாம் என்று அமைச்சர் மா.சுப்ரமணியன் தெரிவித்தார்.

இந்த விவாதத்தின் இடையே சபாநாயகர் அப்பாவு, அமைச்சர் துரைமுருகன் ஆகியோரும் தங்களது கருத்துகளை முன்வைத்தனர்.