ஒமைக்ரான் பரவல் பற்றி மக்கள் பயப்பட தேவையில்லை.

கோவை: 'ஒமைக்ரான் உடனே உயிரை கொல்லும் நோய் அல்ல; இந்த வைரஸ் நான்கு அல்லது ஐந்து நாட்களில் சரியாகி விடும்' என்கிறார் நுரையீரல் மாற்று அறுவை சிகிச்சை மருத்துவ நிபுணர் கணேசன்.
அவர் கூறியதாவது:ஒமைக்ரான் பரவல் பற்றி மக்கள் பயப்பட தேவையில்லை. நம்மை பாதுகாத்து கொள்ள தடுப்பூசி போட்டுக் கொள்ள வேண்டும்.தடுப்பூசி என்பது, இந்த நோய்க்கானது மட்டுமல்ல, அனைத்து நோய் தொற்றையும் தடுக்க கூடிய நோய் எதிர்ப்பு சக்தியாகும். லேசான சளி, காய்ச்சல் இருந்தால், ஆர்டிபிசிஆர் பரிசோதனை செய்தால் போதும். உடனே எக்ஸ்ரே, சி.டி. ஸ்கேன் எடுத்து பார்க்க வேண்டாம்.

அட்மிஷன் போட வேண்டாம்
ஆர்.டி.பி.சி.ஆர்., பரிசோதனையில், பாசிட்டிவ் என வந்தால் உடனே மருத்துவமனைக்கு செல்ல வேண்டாம். வீட்டிலேயே தனிமைப்படுத்தி கொண்டால் போதும்.காய்ச்சல், தலைவலி, உடல் வலி, சளி, வாந்தி, முதுகுவலி, கால்வலி போன்ற உபாதைகள் மூன்று நாட்களுக்கு இருக்கும்.அந்த நாட்களில், டோலோ 650 மாத்திரை சாப்பிட்டால் போதும். இருமல் இருந்தால் அதற்கான மருந்தை எடுத்துக்கொள்ளலாம். அரசு அறிவுறுத்தும் விதிமுறைகளை பின்பற்றி இருப்பது அவசியம்.
ஐந்து நாட்களுக்கு பிறகும் சளி, காய்ச்சல், மூச்சு விட சிரமம் இருந்தால், நுரையீரல் சி.டி.ஸ்கேன் எடுத்து பார்க்க வேண்டும். சி.டி.ஸ்கேனில் பிரச்னை இருந்தால் மட்டும் மருத்துவமனையில் சேர்ந்து சிகிச்சை பெற வேண்டும். இல்லை என்றால் பயம் இல்லை. இந்த நோய் குறித்து மக்களுக்கு அதீத பயம் இருக்கிறது; அது தேவையில்லை.

உயிருக்கு ஆபத்து வராது
இருதய நோய் இருப்பவர்களுக்கு, மேற்கண்ட தொந்தரவுகள் இருந்தால், கவனமாக இருக்க வேண்டும். இவர்களுக்கு நுரையீரலில் நீர் கோர்க்கும் வாய்ப்பு (கார்டியாக் ஆஸ்துமா) அதிகம் உள்ளது. இதை அறிந்து சிகிச்சை எடுக்கவில்லை என்றால் உயிருக்கு ஆபத்து ஏற்படும்.
இருதய நோய், டி.பி., நோய் இருப்பதை கண்டறியாமல், ஸ்டீராய்டு மருந்து கொடுக்கக் கூடாது. கிட்னி பாதிப்பு போன்ற ரிஸ்க்கான நோய் இருப்பவர்கள், 10 சதவீதம் பேர் மட்டுமே உள்ளனர். மீதம் உள்ள, 90 சதவீதம் பேர்களுக்கு உயிர் பிரச்னை வராது. ஐந்து சதவீத நோயாளிகளுக்கு மட்டுமே வென்டிலேட்டர் சிகிச்சை தேவைப்படும்.
எனவே கொரோனா, ஒமைக்ரான் தொற்று ஏற்பட்டால் பயப்படாமல், தனிமை படுத்திக்கொள்ளுங்கள். உயிர் பயத்தில் நடுங்க வேண்டாம். ஸ்டீராய்டு இல்லாமல் நன்றாக மூச்சு விட, நான்கு மணி நேரத்துக்கு ஒருமுறை மூச்சு பயிற்சி செய்வது அவசியம்.
குளிர்ந்த பானங்களை சாப்பிடுவதை தவிர்த்து, எப்போதும் சுடுதண்ணீர் குடிப்பது அவசியம்.மது பழக்கம் இருப்பவர்கள், கவனமாக இருக்க வேண்டும். அவர்களை ஒமைக்ரான் எளிதாக தாக்கும். நோய் காலம் முடியும் வரை, மதுவை தவிர்ப்பது அவசியம். இவ்வாறு, அவர் கூறினார்.
பாசிட்டிவ் வந்தால் என்ன செய்யணும்?
''பாசிட்டிவ்' என தெரிந்தவுடன், உடனே மருத்துவமனையில் சேர்ந்து சிகிச்சை எடுக்க தேவையில்லை. ஒமைக்ரான் உடனே உயிரை கொல்லும் நோய் அல்ல. இந்த வைரஸ் நான்கு அல்லது ஐந்து நாட்களில் சரியாகி விடும். நல்ல புரோட்டீன் நிறைந்த உணவுகளை சாப்பிடுவது நல்லது.
நோய் பாதிப்பு உள்ளவர்கள் தினம் மூன்று வேளை ஆவி பிடித்தல் அவசியம். ஒமைக்ரான் தொற்றால் பாதிக்கப்பட்டவர்கள் மாஸ்க் அணிந்து, வீட்டில் தனிமையாக இருப்பது அவசியம். வீட்டில் இருப்பவர்களும் மாஸ்க் தவறாமல் அணிய வேண்டும்,'' என்கிறார் டாக்டர் கணேசன்.

நன்றி தினமலர்