பிரபஞ்ச அழகி --இந்தியாவின் ஹானஸ் சாந்து

**T.N.Balasubramanian** · **T.N.Balasubramanian** Mon Dec 13, 2021 7:54 pm

பஞ்சாப் மாநிலத்தை சேர்ந்த ஹர்னாஸ் சாந்து என்பவர் 2021 ஆம் ஆண்டுக்கான பிரபஞ்ச அழகி பட்டத்தை வென்றுள்ளார். இந்த செய்தியை மிஸ் யுனிவர்ஸ் அமைப்பு அதிகாரப்பூர்வமாக அறிவித்துள்ளது. 21 ஆண்டுகளுக்கு பின்னர் இந்தியாவிற்கு இந்த வெற்றி கிடைத்துள்ளது.

இஸ்ரேலின் சுற்றுலாத்தளமான எய்லட் நகரில் உள்ள யுனிவர்ஸ் டோமில் 2021ஆம் ஆண்டுக்கான பிரபஞ்ச அழகியை தேர்ந்தெடுக்கும் போட்டி நடைபெற்றது. இதில், பல்வேறு நாடுகளைச் சேர்ந்த சுமார் 80 அழகிகள் பங்கேற்றனர். பல்வேறு சுற்றுகளாக நடைபெற்ற அந்த போட்டியின் இறுதியில், இந்தியாவின் பஞ்சாப் மாநிலத்தை சேர்ந்த ஹர்னாஸ் சாந்து என்பவர் 2021 ஆம் ஆண்டுக்கான பிரபஞ்ச அழகி பட்டத்தை வென்றுள்ளார்.

2021 ஆம் ஆண்டுக்கான பிரபஞ்ச அழகியாக வெற்றி பெற்ற ஹர்னாஸ் சாந்துவுக்கு முன்னாள் பிரபஞ்ச அழகியான மெக்சிகோவை சேர்ந்த ஆண்ட்ரியா மெசா மகுடம் சூட்டினார். 2ஆம் இடத்தை பராகுவே நாட்டை சார்ந்த நதியா ஃபெரீரா மற்றும் 3ஆம் இடத்தை தென் ஆப்பிரிக்கா நாட்டை சார்ந்த லலேலா மஸ்வானே ஆகியோர் பிடித்தனர்.

இந்தியாவை சேர்ந்த மாடல் அழகியான ஹர்னாஸ் சாந்து (21), தனது பள்ளி மற்றும் கல்லூரி படிப்பை சண்டிகரில் முடித்துள்ளார். பல்வேறு அழகிப் போட்டிகளில் பங்கேற்று பட்டங்களையும் அவர் வென்றுள்ளார். டைம்ஸ் ஃப்ரெஷ் ஃபேஸ் மிஸ் சண்டிகர் 2017, மிஸ் மேக்ஸ் எமர்ஜிங் ஸ்டார் இந்தியா 2018 மற்றும் ஃபெமினா மிஸ் இந்தியா பஞ்சாப் 2019 ஆகிய பட்டங்களையும் ஹர்னாஸ் சாந்து பெற்றுள்ளார்.

பிரபஞ்ச அழகி --இந்தியாவின் ஹானஸ் சாந்து Samayam-tamil

மேலும், யாரா தியான் பூ பரன் மற்றும் பாய் ஜி குட்டாங்கே போன்ற பஞ்சாபி படங்களிலும் அவர் நடித்துள்ளார். இந்தியாவில் சுஷ்மிதா சென், லாரா த‌த்தா ஆகியோரை தொடர்ந்து ஹர்னாஸ் சாந்து மகுடம் சூடியுள்ளார். முன்னதாக, இந்தியா சார்பில் லாரா தத்தா 2000ஆம் ஆண்டில் மிஸ் யுனிவர்ஸ் பட்டத்தை வென்றிருந்தார். தற்போது, 21 ஆண்டுகளுக்கு பிறகு இந்தியாவில் இருந்து ஹர்னாஸ் சாந்து பிரபஞ்ச அழகியாக வெற்றி வாகை சூடியுள்ளார்

நன்றி சமயம்