கேரளாவில் இருந்து கொண்டுவரப்படும் மருத்துவ கழிவு: தடுக்க எல்லையில் தீவிர கண்காணிப்பு

ஆனைமலை: தமிழக - கேரள மாநில எல்லைப்பகுதிகளில், தீவிர கண்காணிப்பு மேற்கொள்ள தேசிய பசுமை தீர்ப்பாயம் எச்சரிக்கை விடுத்துள்ளதால், இரு மாநில எல்லையில் கண்காணிப்பு தீவிரப்படுத்தப்பட்டு உள்ளது.
ஆனைமலை அடுத்த செமணாம்பதி, மீனாட்சிபுரம், மணக்கடவு, பெரியபோது, கணபதிபாளையம் பகுதிகள், தமிழக - கேரள மாநில எல்லையாக உள்ளன. பல ஆண்டுகளாக கேரளாவில் இருந்து கொண்டுவரப்படும், இறைச்சி, மருத்துவம் மற்றும் பிளாஸ்டிக் கழிவுகள் தமிழக பகுதிகளுக்குள் ரோட்டோரங்களில் கொட்டப்படுகிறது.
ஏஜென்டுகள் தரப்பில், தமிழக பகுதியில் நிலத்தை குத்தகைக்கு எடுத்து, கேரள கழிவுகளை கொண்டு வந்து இங்குள்ள விளைநிலங்கள் அருகே குழி தோண்டி புதைத்து வருவதும் தொடர்கதையாக உள்ளது.



கேரள மாநில கழிவுகளை கொண்டு வருவோரை, அம்மாநில போலீசார் சோதனைச்சாவடியில் தடுப்பது இல்லை. தங்கள் மாநில கழிவு வெளியில் சென்றால் போதும் என்ற மனநிலையில், கேரள போலீசார் மற்றும் அதிகாரிகள், தமிழகத்துக்கு கழிவுகள் கொண்டுவருவோருக்கு ஆதரவாக செயல்படுகின்றனர்.
தமிழக எல்லையில் உள்ளூர் போலீசார், முறையாக கண்காணிக்காமல் அனுமதிப்பதால், எளிதில் கழிவுகள் தமிழகத்தினுள் வருகிறது.இந்நிலையில், செமணாம்பதி அருகிலுள்ள இரட்டைமடை பிரிவு பகுதியில் தனியார் தோட்டத்தில், கேரளாவின் மருத்துவ, திடக்கழிவுகள் கொட்டப்பட்டது. கடந்த, ஏப்., 8ம் தேதி கழிவுகள் கொட்டிய, மூன்று டிப்பர் லாரிகள், ஒரு பொக்லைன் இயந்திரம் பறிமுதல் செய்யப்பட்டது.

தேசிய பசுமை தீர்ப்பாயம் தாமாக முன்வந்து, வழக்கு பதிவு செய்து விசாரித்து; பல்வேறு உத்தரவுகளை வெளியிட்டது. இதில், 'கழிவுகள் கேரள சோதனைச்சாவடிகளை கடந்து, அங்குள்ள அதிகாரிகளுக்கு தெரிந்து தான், தமிழகத்தினுள் கொண்டு வரப்படுகிறது. எல்லைப்பகுதியில் முறையாக கண்காணிப்பு இல்லாததால் இது நடக்கிறது. அலட்சிய அதிகாரிகள் மீது கடும் நடவடிக்கை எடுக்க வேண்டும்,' என, கடும் எச்சரிக்கை விடுத்துள்ளது.



இதையடுத்து, மாநில எல்லைப்பகுதிகளில் தீவிர கண்காணிப்பு மேற்கொள்ள, மாவட்ட எஸ்.பி., உத்தரவிட்டுள்ளார். இதனால், கேரள மாநில எல்லைப்பகுதிகளிலுள்ள சோதனைச்சாவடிகளில், 24 மணி நேரமும் போலீசார் கண்காணிப்பை தீவிரப்படுத்தி உள்ளனர். போலீசார் முறையாக கண்காணிப்பு செய்தால், தமிழகத்தினுள் கேரள மாநில கழிவுகள் வருவதற்கு வாய்ப்பே இல்லை.

நன்றி தினமலர்/

பரப்பளவில் தமிழகத்தை குறைவானது கேரளா.
கேரளா அரசே !
வேண்டிய அளவு கழிவுகள் எங்கள் மாநிலத்திலேயே,
கிடைக்கிறது. நீங்கள் அனுப்பவேண்டாம்.

தமிழக அதிகாரிகளின் மெத்தனம் கண்டனத்துக்குரியது.
தமிழக அரசே !விழித்துக்கொள்ளுகள்.