டிசம்பர் முதல் எல்லாம் மாறப்போகுது... புது ரூல்ஸ் அமல்!

**T.N.Balasubramanian** · **T.N.Balasubramanian** Mon 29 Nov 2021 - 17:58

சமையல் சிலிண்டர் விலை உள்ளிட்ட பல்வேறு பணம் சார்ந்த விஷயங்கள் டிசம்பர் 1ஆம் தேதி முதல் மாறவிருக்கின்றன. அவை என்னென்ன என்று இங்கே பார்க்கலாம்.

சிலிண்டர் விலை!
ஒவ்வொரு மாதமும் முதல் தேதியில் சமையல் சிலிண்டர் விலை மாற்றம் செய்யப்படுகிறது. சில மாதங்களில் இரண்டு முறை கூற விலை மாற்றம் செய்யப்படுகிறது. கொரோனா பிரச்சினைக்குப் பிறகு சிலிண்டர் விலையும் உயர்ந்திருப்பதால் டிசம்பர் 1ஆம் தேதி சிலிண்டர் விலை குறைக்கப்படுமா என்ற எதிர்பார்ப்பில் பொதுமக்கள் இருக்கின்றனர்.

வீட்டு கடன் சலுகை!
பண்டிகைக் கால சமயத்தில் பல்வேறு வங்கிகள் சிறப்புக் கடன் சலுகைகளை அறிவித்திருந்தன. அந்த சலுகைகள் டிசம்பர் மாதத்தில் முடிவடைகின்றன. எல்.ஐ.சி. ஹவுசிங் ஃபைனான்ஸ் நிறுவனம் அறிவித்த சலுகை மட்டும் நவம்பர் 30ஆம் தேதியுடன் முடிகிறது. மற்ற வங்கிகளின் சலுகைகள் டிசம்பர் 31 வரை உள்ளன. எனவே வீட்டுக் கடன் உள்ளிட்ட கடன்களைப் பெறுவோர் சலுகைகள் உள்ளனவா என முன்கூட்டியே பார்த்து கடன் பெறலாம்.

கிரெடிட் கார்டு!
எஸ்பிஐ கிரெடிட் கார்டு வைத்திருப்போர் கவனத்துக்கு... இந்த கார்டு மூலமாக ஆன்லைன் ஷாப்பிங் செய்ய இனி அதிகம் செலவிட வேண்டியிருக்கும். டிசம்பர் 1 முதல் முதல் எஸ்பிஐ கிரெடிட் கார்டு ஈஎம்ஐகளுக்கு செயல்பாட்டுக் கட்டணமும் சேர்த்து வசூலிக்கப்படும். தற்போது வட்டி மட்டுமே வசூலிக்கப்படுகிறது.

பிஎஃப் - ஆதார் இணைப்பு!
ஆதார் கார்டை பிஎஃப் கணக்குடன் இணைப்பது கட்டாயமாக்கப்பட்டுள்ளது. இதற்கான கால அவகாசம் நவம்பர் 30ஆம் தேதியுடன் முடிவடைகிறது. கால அவகாசம் முடிவதற்குள் ஆதாரை இணைக்காமல் இருந்தால் பிஎஃப் பணம் கிடைப்பதில் பாதிப்பு ஏற்படலாம்.

ஆயுள் சான்றிதழ்!
பென்சன் வாங்குவோர் தாங்கள் உயிரோடுதான் இருக்கிறோம் என்பதைத் தெரிவிக்க ஒவ்வொரு ஆண்டும் ஆயுள் சான்றிதழ் சமர்ப்பிப்பது அவசியமாகும். அதற்கான கால அவகாசம் நவம்பர் 30ஆம் தேதியுடன் முடிவடைகிறது. ஆயுள் சான்றிதழைச் சமர்ப்பிக்க நிறைய வசதிகளும் ஏற்படுத்தப்பட்டுள்ளன. கால அவகாசத்துக்குள் சமர்ப்பிக்காமல் இருந்தால் பென்சன் கிடைப்பதில் சிக்கல் ஏற்படும்.

நன்றி சமயம்