பி.என்.பி., சர்வரில் பாதிப்பு: கோடிக்கணக்கான வாடிக்கையாளர்களின் தகவல்கள் அம்பலம்!

புதுடில்லி:
பொதுத்துறை வங்கியான பஞ்சாப் நேஷனல் வங்கியின்
சர்வரில் ஏற்பட்ட பாதிப்பால் கடந்த 7 மாதங்களாக
அவ்வங்கியின் கோடிக்கணக்கான வாடிக்கையாளர்களின்
தனிப்பட்ட மற்றும் நிதித் தகவல்கள் வெளியாகிக்
கொண்டிருந்துள்ளன.

இதை சைபர் பாதுகாப்பு நிறுவனம் ஒன்று பகிரங்கப்
படுத்தியுள்ளது.

வங்கியின் சர்வரில் ஏற்பட்ட பாதிப்பால் முழு டிஜிட்டல்
அமைப்புக்கும் நிர்வாகக் கட்டுப்பாட்டுடன் அணுகலை
வழங்கியதாக சைபர் எக்ஸ்9 எனும் அந்நிறுவனம் கூறியுள்ளது.

பஞ்சாப் நேஷனல் வங்கி இக்கோளாறை உறுதி செய்துள்ளது.
ஆனால், பாதிப்பு காரணமாக வாடிக்கையாளர்கள் தரவுகள்
எதுவும் வெளியாகவில்லை. முன்னெச்சரிக்கை நடவடிக்கையாக
சர்வரை நிறுத்தியுள்ளதாக அறிவித்தனர்.

பாதிப்பு ஏற்பட்ட சர்வரில் எந்த முக்கிய தகவல்களும் இல்லை.
அவ்வப்போது மத்திய அரசின் அங்கீகாரம் பெற்ற தகவல்
பாதுகாப்பு ஆடிட்டர்களால் சர்வர்கள் சோதிக்கப்பட்டே வருகிறது
என்றனர்.

இப்பாதிப்பை கண்டறிந்த சைபர் எக்ஸ்9 நிறுவனர்
ஹிமான்சு பதக் கூறியதாவது: பஞ்சாப் நேஷனல் வங்கி கடந்த
7 மாதங்களாக அதன் 18 கோடிக்கும் அதிகமான
வாடிக்கையாளர்களின் தனிப்பட்ட மற்றும் நிதித் தகவல்களை
பாதுகாப்பதில் கடுமையாக சமரசம் செய்துள்ளது.

சி.இ.ஆர்.டி., எனப்படும் இந்திய கணினி அவசரக்கால நடவடிக்கை
குழு மூலம் வங்கிக்கு தகவல் அளித்தோம். அதன் பிறகே பஞ்சாப்
நேஷனல் வங்கி விழித்துக்கொண்டு நடவடிக்கை எடுத்தது.

எக்ஸ்சேஞ்ச் சர்வரில் இப்பாதிப்பு காணப்பட்டது. அதன் மூலம்
டொமைன் கட்டுப்பாட்டை அணுகினால், நெட்வொர்க்கில் எந்த
கணினியையும் அணுகுவதற்கு கதவுகள் மிக எளிதாக திறக்கப்படும்.
இவ்வாறு அவர் கூறினார்.

-தினமலர்