ஆழ்துளை கிணற்றில் விழுந்த குழந்தை

செந்தில் · செந்தில் Tue Jan 19, 2010 9:24 am

ஆழ்துளை கிணற்றில் விழுந்த குழந்தை பலி

ஆழ்துளை கிணற்றில் விழுந்த குழந்தை Tblsambavamnews22506350

வாரங்கல் : ஆந்திராவில் ஆழ்துளை கிணற்றுக்குள் தவறி விழுந்த இரண்டு வயது குழந்தை பரிதாபமாக பலியானது. 24 மணி நேர கடும் போராட்டத்துக்குப் பின், குழந்தையின் உடலை மீட்புக் குழுவினர் வெளியில் எடுத்தனர். ஆந்திரா, வாரங்கல் மாவட்டத்தில் சந்துருதண்டா என்ற கிராமம் உள்ளது. இந்த கிராமத்தை சேர்ந்தவர் ரவி. இவரது இரண்டு வயது குழந்தை மகேஷ். இங்குள்ள விவசாய நிலத்தில், ஏராளமான ஆழ்துளை கிணறுகள் அமைக்கப்பட்டிருந்தன. நேற்று முன்தினம் மாலை இங்கு விளையாடிக் கொண்டிருந்த மகேஷ், தவறுதலாக ஆழ் துளை கிணற்றுக்குள் வழுக்கி விழுந்தான். இதையறிந்த பெற்றோர் அதிர்ச்சி அடைந்தனர். தீ அணைப்புப் படையினருக்கு தகவல் கொடுத்தனர். உடனடியாக சம்பவ இடத்திற்கு தீ அணைப்பு படையினரும், மீட்பு குழுவினரும் விரைந்து வந்தனர்.
பொக்லைன் இயந்திரம் மூலம், குழந்தை விழுந்த இடத்திற்கு அருகில் மற்றொரு பள்ளம் தோண்டப்பட்டது. ஆனால், 25 அடிக்கு மேல், பாறையாக இருந்ததால், தொடர்ந்து, தோண்ட முடியவில்லை. இதையடுத்து, பாறையை உடைக்கும் இயந்திரம் கொண்டு வரப்பட்டு, மீட்பு பணிகள் தொடர்ந்து நடந்தன. இதற்கிடையே, கிணற்றுக்குள் விழுந்த குழந்தை சுவாசிப்பதற்கு வசதியாக, குழாய் மூலம் ஆக்சிஜன் செலுத்தப்பட்டது. அதி நவீன கேமராக்கள் மூலம் எடுக்கப்பட்ட புகைப்படத்தில், கிணற்றுக்குள் குழந்தை மகேஷ் உயிருடன் இருப்பது தெரியவந்தது. மருத்துவ குழுவும் சம்பவ இடத்தில் முகாமிட்டிருந்தது.
இந்நிலையில், 24 மணி நேர கடும் போராட்டத்துக்கு பின், மீட்பு குழுவினர் நேற்று மாலை குழந்தையை வெளியில் எடுத்தனர். ஆனால், அதற்கு முன்னதாகவே குழந்தை இறந்திருந்தது தெரியவந்தது. இதனால், மீட்பு குழுவினர், கிராம மக்கள் மத்தியில் கடும் சோகம் நிலவியது. குறைந்த பட்சம் 40 அடி ஆழமுள்ள ஆழ்துளை கிணற்றுக்குள் தவறி விழுந்த இரண்டு வயது குழந்தை, காற்று மற்றும் வெளிச்சம் இல்லாத நிலையில், ஏதாவது அதிசயம் நடந்தால் மட்டுமே உயிர் பிழைப்பதற்கான வாய்ப்பு உள்ளது. அது போன்ற அதிசயம் நடக்கும் என, கிராம மக்களும், மீட்பு குழுவினரும் பெரிதும் நம்பினர். ஆனால், துரதிர்ஷ்டவசமாக, அதுபோன்ற அதிசயம் எதுவும் நேற்று நடக்கவில்லை.

தின மலர்