நவராத்திரிக்கு என்ன கலர் புடவை

-
அம்பாள் வழிபாட்டுக்குரிய நவராத்திரியில், பெண்கள் என்ன
கலர் புடவை அணிந்து வழிபட வேண்டும் என்பதற்கும், சில
விதிமுறைகள் உள்ளன. இன்ன நிறத்துக்கு இன்ன பலன் என்ற
கணிப்பும், வடமாநிலங்களில் இருக்கிறது. நாமும் அதைப்
பின்பற்றலாம்.

வடமாநிலங்களில், நவராத்திரியை துர்கா பூஜை என்பர்.
முதல் நாள் ஷைலபுரி என்ற பெயரில் அம்பாளை, பெண்கள்
வழிபடுவர். அன்று, ஆரஞ்சு நிற புடவை உடுத்த வேண்டும்.
இந்த நிறம் உடலுக்கு சக்தியையும், மகிழ்ச்சியையும் அளிக்கும்.

இரண்டாம் நாள், பிரம்ஹச்சாரிணி என்ற பெயரில், அம்பாளை
வழிபடுவர். அன்று, பூப்போட்ட வெள்ளை நிறப்புடவை அணிய
வேண்டும். இந்த நிறம் மனச்சுத்தம், மன அமைதி மற்றும்
தியானத்தில் ஈடுபாடு ஆகியவற்றை வழங்கும்.

மூன்றாம் நாள், சிவப்பு புடவை அணிந்து, சந்திரகாந்தா என்ற
பெயரில், அம்பாளை வழிபட வேண்டும். இந்த நிறம், பயமின்மை,
மன தைரியத்தை வழங்கும்.

நவராத்திரியின் நான்காம் நாள், கூஷ்மாண்டா என்ற பெயரில்,
அம்பாளை வணங்க வேண்டும். இந்நாளில், நீலப் புடவை
அணிய வேண்டும். இது, கடல் வளத்தையும், நல்ல
வருமானத்தையும், ஆரோக்கியத்தையும் அளிக்கும்.

ஐந்தாம் நாள், மஞ்சள் வண்ணப் புடவை அணிந்து, ஸ்கந்தமாதா
என்ற பெயரில் அம்பாளை வழிபட வேண்டும். மஞ்சள் நிறம்,
முகத்திற்கு வசீகரத்தையும், தாலி பாக்கியத்தையும் அளிக்கும்.

ஆறாம் நாள், அம்பாளை காத்யாயனி என்ற பெயரில், பச்சைப்
புடவை அணிந்து வழிபட வேண்டும். நேரத்துக்கு மழை,
விவசாய செழிப்பு, வாழ்க்கையில் திருப்பம், வளர்ச்சி
ஆகியவற்றை தரும்.

ஏழாம் நாள், அம்பாளுக்கு காளராத்ரி என்ற பெயர் சூட்டி,
சாம்பல் நிற (கிரே கலர்) புடவை அணிந்து வணங்க வேண்டும்.
இந்த நிறம், நமக்கு மட்டுமின்றி, நம்மைப் பார்ப்பவர்களுக்கும்
சக்தியைத் தரும். கெட்ட சக்திகளிடமிருந்து பாதுகாப்பு தரும்.
எடுத்த செயல்கள் சுபமாக முடியும்.

எட்டாம் நாள், வயலட் நிற புடவை அணிந்து, மகா கவுரி என்ற
பெயரில், அம்பாளை வழிபட வேண்டும். இந்த நிறம், கல்வி
அறிவைத் தரும்.

ஒன்பதாம் நாளில், மயில் பச்சை நிறப்புடவை அணிந்து,
சித்திதாத்ரி என்ற பெயரில் அம்பாளை வழிபட வேண்டும். இந்த
நிறம், அம்பாளும், சிவனும் ஒற்றுமையாக இருப்பதுபோல்,
கணவன், மனைவி ஒற்றுமைக்கு வழிவகுக்கும்.

இப்படி ஒன்பது நாட்களும் புடவை உடுத்தி, பக்திப்பூர்வமாக
அம்பாளை வணங்கி நற்பலன் பெறலாம்.

புதுப்புடவை தான் எடுக்க வேண்டுமென்பதில்லை. கைவசம்
உள்ள புடவைகளை அணிந்தாலே போதும். இந்த ஆண்டு,
அக்., 7ல் துவங்கி, 14ம் தேதி வரை, எட்டு நாட்களே நவராத்திரி
வருவதால், ஒன்பதாம் நாள் புடவையை, அக்., 15 – விஜய
தசமியன்று அணிந்து கொள்ளலாம்.

கொலு பொம்மைகளை அக்., 6 அன்றே அடுக்கி விடலாம்.

தி. செல்லப்பா
நன்றி-வாரமலர்