`வெரிகோஸ் வெயின்ஸ்' (Varicose Veins) எனப்படுகிற பிரச்னைக்கு தீர்வு!

எனக்கு வயது 40. கர்ப்பமாக இருந்தபோது அடிக்கடி கால்களில்
நரம்பு சுருட்டி இழுக்கும் பிரச்னை இருந்தது. கர்ப்ப காலத்தில்
அது சகஜம் என்றார்கள். ஆனால் 15 வருடங்கள் கழித்து இப்போது
மீண்டும் அதே பிரச்னை வந்திருக்கிறது.
இரவுத் தூக்கத்தில் அடிக்கடி இப்படி நரம்பு சுருட்டிக்கொண்டு
வலி உயிர் போகிறது. இது எதனால்? இதை குணப்படுத்த என்ன
வழி? எந்த மருத்துவரைச் சந்திக்க வேண்டும்?

-கே.தமிழ்ச்செல்வி, சேலம்
-----------------------
-

பதில் சொல்கிறார் சென்னையைச் சேர்ந்த ரத்தநாள அறுவை
சிகிச்சை மருத்துவர் மணிகண்ட பிரபு

நீங்கள் குறிப்பிட்டிருப்பது `வெரிகோஸ் வெயின்ஸ்'
(Varicose Veins) எனப்படுகிற பிரச்னை. இது பரவலாக
பலரும் சந்திக்கிற பிரச்னைதான்.

சில பெண்களுக்கு கர்ப்ப காலத்தில் வந்துவிட்டு, பிறகு தானாகச்
சரியாகி விடும். சிலருக்கு அது அப்படியே நீடிப்பதோடு, அதன்
தீவிரமும் அதிகரிக்கும். இதற்கு நீங்கள் `வாஸ்குலர் சர்ஜன்'
எனப்படும் ரத்தக்குழாய் அறுவை சிகிச்சை மருத்துவரைச்
சந்திக்க வேண்டும்.

உங்கள் கேள்வியை வைத்துப் பார்க்கும் போது உங்களுக்கு
வெரிகோஸ் வெயின்ஸ் வளர்ந்து வருவது தெரிகிறது. அதை
உறுதிப்படுத்த ‘டாப்ளர் ஸ்கேன்’ (Doppler Scan) என்ற
பரிசோதனையைச் செய்து பார்ப்பார்கள்.

அதில் பிரச்னை இருப்பது தெரிந்தால் சிகிச்சை ஆரம்பிக்கப்படும்.
அதாவது அறுவை சிகிச்சை செய்யப்படும். அறுவை சிகிச்சை
என்றதும் ஓப்பன் அறுவை சிகிச்சையோ என பயப்பட வேண்டாம்.

இது லேசர் முறையில் மேற் கொள்ளப்படும். லேசர், ரேடியோ
ஃப்ரீக்வன்சி அப்ளேஷன், க்ளூ மற்றும் `ஸ்கீலெரோதெரபி'
(Sclerotherapy) போன்று சின்னச்சின்ன ஊசிகள் மூலம் மேற்
கொள்ளப்படும் சிகிச்சைகள் இருக்கின்றன.

சிறிய ஆபரேஷன்தான். ஒரே நாளில் அறுவை சிகிச்சை முடிந்து
வீட்டுக்குத் திரும்பிவிடலாம். மேற்குறிப்பிட்ட சிகிச்சைகளில்
உங்களுக்கு எது தேவை என்பதை மருத்துவர் முடிவு செய்வார்.
வெரிகோஸ் வெயின்ஸ் பிரச்னைக்கான சிகிச்சைகள் ரொம்பவே
எளிதானவை. எனவே, இதுகுறித்து பயப்படத் தேவையில்லை.
-
நன்றி- வைதேகி, அவள் பதில்கள்
அவள் விகடன்

நல்ல தகவல்.

அதிக நேரம் நின்றுகொண்டே வேலை செய்பவர்களுக்கும் இந்த நோய் தொல்லை கொடுக்குமென அறிகிறேன். நின்று கொண்டே மாணவ மாணவிகளுக்கு கற்பிக்கும் வாத்யார்களுக்கும் 
துணிக்கடை /பெரிய பெரிய ஸ்டோர்களில் வேலை செய்பவர்களுக்கும் இந்த நோய் தாக்கலாம்.