கவிதைகள் - ரசித்தவை

by **ayyasamy ram** Wed Sep 01, 2021 6:01 pm

மவுனத்தின் சப்தம்- கவிதை

-
எப்போது இயல்பு நிலைக்குத் திரும்பும்
இத்தேசம்?
யாருக்கும் தெரியாது…

அடிமையென வாழும் வாழ்க்கையில்
உயிருக்கு உத்திரவாதம் இல்லை
யாரோ ஒருவர் நீட்டிய
உதவிக்கரம் பற்றி
மொழி அறியாத ஒரு நாட்டின்
அகதிகள் முகாமில் தனது மனைவி
மகள்களோடு அடைக்கலமாகிறான்

ஒவ்வொரு நாளையும் யுகமென
நகர்த்தி ஆங்காங்கே நடக்கும்
கூட்டங்களில் அரசு ஆதரவு தர
கோஷங்களை எழுப்புகிறான்

தொலைக்காட்சிகளிலும்
செய்தித்தாள்களிலும்
சமூக வலைத்தளங்களிலும்
நல்லதோர் விடியலைத்
தேடித்தேடிக் களைத்த அவனிடம்
‘நம்ம வீட்டுக்கு எப்பப்பா
போகப்போகிறோம்?’ என கேட்கும்
மகளின் கேள்விக்குப் பதிலாய்
அவன் உரைக்கும் மவுனத்தின் சப்தம்
இப்பொழுது உங்களுக்கும்
கேட்கக்கூடும்…
-------------
-காமராஜ்
நன்றி-காமதேனு

by **ayyasamy ram** Wed Sep 01, 2021 6:01 pm

பயமறியட்டும் இளங்கன்றுகள் – கவிதை

-

எப்போதாவது நிகழ்ந்தால் விபத்து
எப்போதுமே நிகழ்ந்தால் ஆபத்து
வாழ்வில்
முந்த வேண்டியிருக்கையில்
வளைவுகளில் முந்தலாமா?

வேகமெடுத்தால்
பந்தயத்தை ஜெயிக்கலாம்
நிதானித்தால் மட்டுமே
பயணத்தை தொடரலாம்

அதிகாலை விபத்தில்
ஐந்து பேர் பலியென
பெட்டிச் செய்தியோடு
விட்டுப்போகவா பிறந்தோம்?

இனியாவது இளங்கன்றுகள்
பயமறிய வேண்டும் சாலைகளில்
–
——————–
காசாவயல் கண்ணன்
நன்றி-காமதேனு

by **ayyasamy ram** Wed Sep 01, 2021 6:02 pm

தளர்வு – கவிதை

-
வேலை நிமித்தம்
வெளிநாடு போகிறான்
வழியனுப்புகிறாள் மனைவி…

’இரண்டு வருடத்தில் வந்து விடுங்கள்!’
மூன்று வருடமாவது ஆகும்!’
‘விடுமுறை கிடைக்கும்போதெல்லாம்
வந்துவிடுங்கள்’
‘கிடைத்தால் கண்டிப்பாக வருவேன்!’
விமானத்துடன் பிரிவும் கிளம்புகிறது.

அவள் வீட்டிலும்
இவன் அயல் மண்ணிலும்
குழந்தைகள் பள்ளியிலும்
ஆசுவாசமாக அமர்ந்திருக்க
பிரிவு கவலை சோகம்
அத்தனையும் மீறி அவர்களிடையே
இறுக்கம் தளர்ந்து சிரிக்கிறது
மெல்லிய விடுதலை ஒன்று!
—————-
–
கி.ரவிக்குமார
நன்றி- காமதேனு

by Sponsored content

கவிதைகள் - ரசித்தவை

கவிதைகள் - ரசித்தவை

Re: கவிதைகள் - ரசித்தவை

Re: கவிதைகள் - ரசித்தவை

Re: கவிதைகள் - ரசித்தவை