தாய்க் கோழி - கவிதை

**ayyasamy ram** · **ayyasamy ram** Wed Aug 18, 2021 12:52 pm

-
`நெல்உமியும் குறுமணலும்
வெம்மை குளிர்ச்சி கலந்து தரும்.’’
உடைந்த மண்பாண்டமதை சரிபாதி இரண்டாக்கி
வாய்ப்பகுதி தரை கவிழ்த்து
அரைவட்டமதை மேலமர்த்தி
சிவன் சிரசின் பிறைவடிவில் தவப்படுக்கையதை
அம்மா செய்வாள்.

நெல்உமியும் குறுமணலும்
வெம்மை குளிர்ச்சி கலந்து தரும்
மென்படுக்கையதனில் கருவிட்டு வம்சத்தவம்
துவக்கும் கோழி.

கள்ளப்பூனை மூஞ்சூறு
களவாட அருகில் வர
காளி போல் வெகுண்டெழுந்து
காத தூரம் விரட்டி விடும்.
செல்லச்சேவல் நெருங்கி வர
மெல்ல மறுத்துத் திருப்பிவிடும்.
நள்ளிரவில் பார்த்தாலும்
வட்டவிழி முழித்திருக்கும்
எறும்புகூட ஏறிடாமல்
இமைக்காமல் காவல் காக்கும்.

மூன்றுவார கடுந்தவத்தில் மாமுனிகள் தோற்றுவிடும்
தவச்சூட்டின் வெம்மையிலே
கருத்திரண்டு உருவமாகும்.
பசி தாகம் மலம் அடக்கி
பல நாட்கள் தூங்கிடாத
தாய்க்கோழி சோர்வு கண்டு
பரிதவிக்கும் என் தாயின் மனதும்.

சிலிர்க்கும் முதுகிறகு பற்றி
பூப்பந்தெனத் தூக்கிவந்து
வெளிமுற்றம் இறக்கிவிட்டு
வெயில் முகத்ததனைக் காட்டி
கேழ்வரகும் கம்பும் கொடுத்து
கிண்ணத்தில் தண்ணீர் வைத்து
பசியடங்கித் தாகம் தீர்ந்து
பல நாளின் கழிவைத் தள்ளி
அடைக்கோழி திரும்பும் வரை
முந்தானைச்சேலை அடைமேல் போர்த்தி
தாய்க்கோழியாய் நிற்பாள் அம்மா..!

-நாராயணபுரம் கணேசவீரன்.
நன்றி-விகடன்

**ayyasamy ram** · **ayyasamy ram** Wed Aug 18, 2021 12:57 pm

கோழிமுட்டை விளம்பரம்

-

-
கோழி ஓர் முட்டையிட்டு
கொக்கரித்துப் பறக்கிறது
ஆழியில் ஓர் ஆமை
அமைதியாக மறைகிறது

திண்ணையிலே கழிக்கிறது கோழி
வேலியிலே குதிக்கிறது
மண்கிழறிச் சிரிக்கிறது
மறுபடியும் “கொக்கரக்கோ”

முட்டையிட்ட சேதியை
ஊருக்கு அறிவித்துவிட்டு
கோழி பொழுதுபட்டால்
கூட்டுக்குள் அடங்கிவிடும்

ஊர் அமைதியான பின்
உசுப்பாமல் ஓர் ஆமை
கடல்விட்டுக் கரையேறி
திடல் வந்து தோண்டி...

ஆயிரம் முட்டைகளை
அடுக்கடுக்காய் விட்டபின்னர்
அமைதியாக மூடிவிட்டு
ஆரவாரமின்றி ஆழிபோகும்.

கோழியின் ஓர் முட்டை
கொழும்புவரை தெரிகிறது
ஆமையின் ஆயிரம்
அயலவர்க்கே தெரியவில்லை.
------------
- ஜே. வஹாப்தீன்
தினகரன் .lk வாரமஞ்சரி

**ayyasamy ram** · **ayyasamy ram** Wed Aug 18, 2021 12:59 pm

உயர்வு - கவிதை

-

படிப்பு உயர வாசிப்பு உயரும்
வாசிப்பு உயர புத்தகம் உயரும்
புத்தகம் உயர அறிவு உயரும்
அறிவு உயர ஞானம் உயரும்

ஞானம் உயர புத்தி உயரும்
புத்தி உயர ஆக்கம் உயரும்
ஆக்கம் உயர கலை உயரும்
கலை உயர சுவைத்தல் உயரும்

சுவைத்தல் உயர அடக்கம் உயரும்
அடக்கம் உயர நிம்மதி உயரும்
நிம்மதி உயர வெற்றி உயரும்
வெற்றி உயர சமூகம் உயரும்

சமூகம் உயர தேசம் உயரும்
தேசம் உயர அரசு உயரும்
அரசு உயர ஞாலம் உயரும்
ஞாலம் உயர எல்லாம் உயரும்
----------------
- ஜீ.ஆர்.குணதிலக -
தினகரன் .lk வாரமஞ்சரி

**ayyasamy ram** · **ayyasamy ram** Wed Aug 18, 2021 1:00 pm

நீ வருவாயென...(கவிதை)

-

-
சிதறிய பூவிதழ்களாய் - அன்று
காற்றின் பாதையிலே:
பாடசாலைக் கருவறையில்
விழி பதித்துக் கொண்டோம்...
இதயம் சொன்ன
வார்த்தைகள் எல்லாம்;
நண்பியே...!!! உன்னில்
புதைத்து நின்றேன்...
வானமும் வியக்கும் - பரந்த
இன்பங்கள்...
கடலும் சிலிர்த்துப் போகும்;
அலைகளையும் முட்டி மோதிவிடும்
சின்னச் சண்டைகள்...
கூடும் நேரங்களில் - செல்ல
வேடிக்கைகள்...
உனக்கும் எனக்கும்
என்ன உறவு???!!
கேள்விக்கு அவசியமே
இருக்கவில்லை...
நட்பின் ஆழத்தில் - மீள மனமில்லா
சிறை கிடந்தோம்...
மின்னல் கீற்றுக்களால்
இமைகள் படபடக்கவே...

துடைக்க கரம் தேடினேன்...
எங்கே என் நண்பி???
ஆயிரமாயிரம் பேசிக் கொண்டோம்
காலத்தின் முடிவை - மட்டும்
பேசவே மறந்தோம்...
விடை அறிந்திடா - புதிரிது...
இன்னும் புரிந்திடா - பிரிவிது...
கால மழையினிலே - குடையின்றி நானும்...
தோழியே!!! நீ வருவாய் என...

- நுஸ்கியா -
தினகரன் .lk வாரமஞ்சரி

Sponsored content · Sponsored content

தாய்க் கோழி - கவிதை

தாய்க் கோழி - கவிதை

Re: தாய்க் கோழி - கவிதை

Re: தாய்க் கோழி - கவிதை

Re: தாய்க் கோழி - கவிதை

Re: தாய்க் கோழி - கவிதை

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக