வேண்டும் வேண்டும் உங்கள் உறவு

“வேண்டும் வேண்டும் உங்கள் உறவு”

‘மருவு பெண்ணாசை மறக்க வேண்டும்
உனை என்றும் மறவாது இருக்க வேண்டும்’

என்று கந்தவேளை நோக்கி வள்ளலார் வேண்டுகிறார்.

ஆனால் இங்கே காதலர்கள் எனக்கு நீ வேண்டும்… உனக்கு நான் வேண்டும்…என்று தமது ஆன்மாவின் தேடலை பாடலாக்கி உள்ளனர்.

முதலில் வாணி அம்மாவின் ஆலாபனை விட்டு விட்டு தொடர இடைவெளிகளில் ஒரு கிடார் பிட். தொடர்ந்து வயலின், சிதார் இசைத்து முடிக்க

“வேண்டும் வேண்டும் உங்கள் உறவு
வெண்பனித் தென்றல் உள்ள வரையில்”
என்ற பல்லவியில் நம்மை கரைத்து விடுவார் வாணி ஜெயராம். அந்த ‘தென்றல்’ அவர் பாடுகையில் இன்னும் குளிர்ந்து பனிக்குழைவாய் இனிக்கிறது.

பல்லவி முடிந்ததும் மீண்டும் வயலின் பாடலை வாங்கி சிதாரிடம் தர அதன் கிளுகிளுப்பு முடிய உடன் தொடங்கும் குழல் இசையும் தபலாவின் துள்ளலும் சட்டென நிறுத்த, மீண்டும் பொங்கும் தபலாவின் தாளத்துடன்

“தோன்றும் இளமை தொடர்ந்திட வேண்டும்
தொடரும் மாலை வளர்ந்திட வேண்டும்”

என்று வாணியம்மா சரணத்தை தொடர, நம் மனமும் தொடர்ந்திட வேண்டும் இந்த இனிமை என்று கெஞ்சும்.

“நெஞ்சில் நீயே நிறைந்திட வேண்டும்
நீண்ட இரவுகள் நான் பெற வேண்டும்”

என்று வேண்டும் நாயகன். இது அன்பின் பரிமாற்றம். ஆழ் மனத்தின் ஏக்கம்…எஸ்.பி.பியின் குரலும், கடைசியில் அவர் தரும் ஹம்மிங்கும் உயிரை வதைக்கும் உன்னத அனுபவம்.

இப்பாடல் முழுவதும் தபலாவின் ஆளுமை குறிப்பிட்டு சொல்ல வேண்டிய ஒன்று.

இன்னும் வேண்டும் இந்த இன்பம் என்று ஏங்க வைக்கும் பாடல்.
————————-
படம்: வசந்தத்தில் ஓர் நாள்
கவிஞர்: வாலி
இசை: எம்.எஸ். விஸ்வநாதன்
குரல்கள்: வாணி ஜெயராம், எஸ்.பி.பாலசுப்ரமணியம்
—————————
பாடல் வரிகள்:

பெண்:
வேண்டும் வேண்டும் உங்கள் உறவு
வேண்டும் வேண்டும் உங்கள் உறவு
வெண்பனித் தென்றல் உள்ள வரையில்
வெண்பனித் தென்றல் உள்ள வரையில்

தோன்றும் இளமை தொடர்ந்திட வேண்டும்
தொடரும் மாலை வளர்ந்திட வேண்டும்
நான்கு இதழ்கள் கலந்திட வேண்டும்
நாளை என்பதே மறந்திட வேண்டும்

ஆண்:
வேண்டும் வேண்டும் உந்தன் அழகு
வெண்பனித் தென்றல் உள்ள வரையில்
வெண்பனித் தென்றல் உள்ள வரையில்

நெஞ்சில் நீயே நிறைந்திட வேண்டும்
நீண்ட இரவுகள் நான் பெற வேண்டும்
கொஞ்சும் மொழிகள் நீ சொல்ல வேண்டும்
கோடை மழையில் நான் நனைந்திட வேண்டும்
வேண்டும் வேண்டும் உந்தன் அழகு
வெண்பனித் தென்றல் உள்ள வரையில்
வெண்பனித் தென்றல் உள்ள வரையில்

பெண்:
உலகம் என்னைப் புகழ்ந்திட வேண்டும்
உங்கள் காலடி தொடர்ந்திட வேண்டும்
ஆண்:
உனை நினைத்தே நான் வாழ்ந்திட வேண்டும்
ஒவ்வொரு பிறப்பிலும் இணைந்திட வேண்டும்
இருவரும்:
வேண்டும் வேண்டும் உங்கள் உறவு
வெண்பனித் தென்றல் உள்ள வரையில்
வெண்பனித் தென்றல் உள்ள வரையில்
-
நன்றி-ஜெயசீலன்

எங்கள் நாட்டில் அதாவது மலேசியாவில்
எடுக்கப் பட்ட படம் ஐயா.

மாணிக்கம் நடேசன் wrote:எங்கள் நாட்டில் அதாவது மலேசியாவில்
எடுக்கப் பட்ட படம் ஐயா.

மேற்கோள் செய்த பதிவு: 1349880
அதெல்லாம் போகட்டும் அய்யா ..............
ஏதோ பிரதமர் பதவிக்கு மனு போடுவதாக சொன்னீர்களே.....என்னாயிற்று?

அது வரட்டும் ஒரு பத்து படமாவது தயாரிக்கலாம்.