அரசியலுக்கு வருவேனா? இல்லையா ? - ஆலோசித்து சொல்கிறேன் என்கிறார் ரஜினி

சென்னை:
எதிர்காலத்தில் நான் அரசியலுக்கு வருவேனா இல்லையா
என்ற கேள்வி இருப்பதாகவும், அதற்கு தனது மக்கள் மன்ற
நிர்வாகிகளுடன் ஆலோசித்துவிட்டு கூறுவதாகவும்
நடிகர் ரஜினிகாந்த் தெரிவித்துள்ளார்.

நடிகர் ரஜினிகாந்த், அரசியலுக்கு வரப்போவதாக பல்வேறு
செய்திகள் வெளிவந்த நிலையில், தன் உடல்நிலையை
காரணம்காட்டி அரசியலுக்கு வரப்போவதில்லை என திடீரென
அறிவித்தார். இதனைத்தொடர்ந்து ‛அண்ணாத்த'
திரைப்படத்தின் சூட்டிங் பணியில் பிசியாக இருந்தார்.

'அண்ணாத்த' படப்பிடிப்பை முடித்த ரஜினி, 'டப்பிங்' பணியை
ஆரம்பிப்பதற்குள், மருத்துவ சிகிச்சைக்காக அமெரிக்கா
சென்று திரும்பினார்.

இந்நிலையில், இன்று (ஜூலை 12) சென்னை, கோடம்பாக்கத்தில்
உள்ள, ராகவேந்திரா திருமண மண்டபத்தில், தனது மக்கள்
மன்ற நிர்வாகிகளை சந்திக்க உள்ளார்.
அதற்கு முன்னதாக அவர் செய்தியாளர்களிடம் கூறியதாவது:

நான் அரசியலுக்கு வரப்போவதில்லை, வரமுடியவில்லை என
சொன்னப்பிறகு என்னுடைய மக்கள் மன்ற நிர்வாகிகளையும்
ரசிகர்களையும் சந்திக்க முடியவில்லை.

அண்ணாத்த திரைப்பட சூட்டிங் தாமதமானது, அதன்பிறகு
தேர்தல் வந்தது, கோவிட் பரவல் இருந்தது. அதற்கு பிறகு,
என்னுடைய மருத்துவ பரிசோதனைக்காக நான் அமெரிக்கா
சென்று திரும்பியுள்ளேன்.

மக்கள் மன்றத்தை தொடரலாமா?, அதன் பணி என்ன? போன்ற
கேள்விகள் மக்கள் மன்ற நிர்வாகிகள், ரசிகர்களுக்கு உள்ளன.

அதேபோல, எதிர்காலத்தில நான் அரசியலுக்கு வருவேனா,
இல்லையா போன்ற கேள்விகளும் இருக்கிறது. இது போன்ற பல
விஷயங்களை மக்கள் மன்ற நிர்வாகிகளுடன் ஆலோசனை
செய்துவிட்டு செய்தியாளர்களிடம் தெரிவிக்கிறேன்.
இவ்வாறு அவர் கூறினார்.

தினமலர்