மே.வங்க சட்டசபையில் அமளி: பாதியில் பேச்சை நிறுத்திய கவர்னர்

கோல்கட்டா: மேற்குவங்கத்தில் தேர்தலுக்கு பிந்தைய வன்முறை
சம்பவம் தொடர்பாக, சட்டசபையில் பா.ஜ., எம்.எல்.ஏ.,க்கள்
அமளியில் ஈடுபட்டனர். இதனையடுத்து கவர்னர், தனது உரையை
முடிக்காமல் கிளம்பி சென்றார்

மேற்கு வங்கத்தில் சமீபத்தில் சட்டசபை தேர்தல் நடந்தது.
தேர்தல் பிரசாரம், ஓட்டுப்பதிவின் போது பல இடங்களில்
வன்முறை வெடித்தது. மம்தா பானர்ஜி தலைமையிலான,
திரிணமுல் காங்., வென்று, மூன்றாவது முறையாக ஆட்சி
அமைத்துள்ளது.

மே 2ம் தேதி தேர்தல் முடிவுகள் வெளியான பின், மேற்கு
வங்கத்தில் பல இடங்களில் வன்முறை வெடித்தது. இதில்,
பா.ஜ.,வைச் சேர்ந்த சிலர் கொல்லப்பட்டனர். இது தொடர்பாக,
உச்சநீதிமன்றத்திலும் வழக்கு தொடரப்பட்டது.

முதல்வர் மம்தா மீதும் கவர்னர் ஜெக்தீப் தங்கார் குற்றம்
சாட்டினார். இதனால், கவர்னர்- மாநில அரசுகள் இடையே
மோதல் ஏற்பட்டது. ஒருவர் மீது ஒருவர் குற்றம்சாட்டினர்.

கவர்னரை பதவி நீக்கம் செய்ய வேண்டும் என மம்தா
கோரிக்கை விடுத்தார்.

இந்த பரபரப்பான சூழலில் மே.வங்க சட்டசபை இன்று
(ஜூலை 2) கூடியது. முதல்நாளான இன்று கவர்னர்
ஜெகதீப் தங்கார் உரையாற்றினார். இதற்காக சட்டசபை
வந்த கவர்னரை, முதல்வர் மம்தா அழைத்து சென்றார்.

கவர்னரின் உரை துவங்கிய சிறிது நேரத்தில்
பா.ஜ. எம்.எல்.ஏ.,க்கள் அமளியில் ஈடுபட்டனர்.
பதாகைகளை ஏந்திய பா.ஜ., எம்.எல்.ஏ.,க்கள் அரசுக்கு
எதிராக கோஷம் போட்டனர்.

இதனையடுத்து தனது 10 நிமிடத்தில் உரையை நிறுத்திய
கவர்னர், பாதுகாப்புடன் அனுப்பி வைக்கப்பட்டார்.

பின்னர் எதிர்க்கட்சி தலைவர் சுவேந்து அதிகாரி செய்தியாளர்களிடம்
கூறியதாவது:

மேற்கு வங்கத்தில் தேர்தலுக்கு பின்பு நடைபெற்ற வன்முறை
காட்டுமிராண்டித்தனமானது. இதில் பா.ஜ., ஊழியர்கள் கொலை
செய்யப்பட்டனர். 300க்கும் அதிகமான பெண்கள்
துன்புறுத்தப்பட்டனர். அதில் சிலர் பாலியல் வன்கொடுமைக்கும்
ஆளாகினர். இதுகுறித்த எந்த தகவல்களும் கவர்னர் உரையில்
இடம்பெறவில்லை.

எனவே சட்டசபையில் பா.ஜ., எம்.எல்.ஏ.,க்கள் போராட்டத்தில்
ஈடுபட்டனர். அறிக்கையில் இடம்பெற்றுள்ளதை அப்படியே
வாசிக்க தேவையில்லை. அந்த அறிக்கையில், அரசியல்
சாசனத்திற்கு எதிராக எழுதி கொடுக்கப்பட்டால், அப்படியே
வாசிக்க முடியுமமா?

வன்முறை குறித்த விசாரணையை தன்னாட்சி அமைப்பிடம்
ஒப்படைக்க வேண்டும் என்ற கோல்கட்டா உயர்நீதிமன்ற
தீர்பை வரவேற்கிறோம். மேலும், இந்த வழக்கின் முதல் தகவல்
அறிக்கையை வேறு மாநிலத்தில் பதிய வேண்டும்.

அப்போது தான் விசாரணை நேர்மையாக நடைபெறும்.
இவ்வாறு அவர் கூறினார்.

தினமலர்