சிசுவின் கண்கள் தானம்

by தண்டாயுதபாணி Sun Jan 17, 2010 10:16 am

திருச்சி : திருச்சி திருவானைக்காவலை சேர்ந்தவர்
ராஜகோபால்(35). கார் டிரைவர். இவரது மனைவி அன்னபூரணி(28). நிறைமாத
கர்ப்பிணியாக இருந்த அன்னபூரணி, நேற்று முன்தினம் காட்டூர் பகுதியில் உள்ள
தனியார் மருத்துவமனையில் சேர்க்கப்பட்டார்.
இரவு 9.10 மணியளவில்
அவருக்கு ஆண் குழந்தை பிறந்தது. இதனால் ராஜகோபாலும், உறவினர்களும் மிகவும்
மகிழ்ச்சி அடைந்தனர். இந்த சந்தோஷம் சில மணி நேரங்களே நீடித்தது. நள்ளிரவு
2.30 மணியளவில் குழந்தைக்கு திடீரென மூச்சுத்திணறல் ஏற்பட்டு, பரிதாபமாக
இறந்தது. ராஜகோபாலும், அன்னபூரணி யும் கதறி அழுதனர்.
இதன்பின், தனது
குழந்தையின் உறுப்புகளை தானமாக வழங்க முடியுமா என டாக்டர்களிடம் ராஜகோபால்
கேட்டார். பிறந்த சில மணி நேரமே ஆன குழந்தையின் உறுப்புகளை அகற்றக்கூடிய
நவீன சிகிச்சை சென்னை போன்ற நகரங்களில்தான் உள்ளது என கூறப்பட்டது. ஆனால்,
கண்களை தானமாக கொடுக்கலாம் என டாக்டர்கள் கூறினர். இதையடுத்து, திருச்சி
ஜோசப் கண் மருத்துவமனைக்கு, குழந்தையின் கண்கள் நேற்று தானமாக
கொடுக்கப்பட்டது. ராஜகோபால் கூறுகையில், ‘குழந்தை இறந்ததால் மனமுடைந்து
போனோம். சிறிது நேரம் யோசித்து, உடல் உறுப்புகளை தானம் செய்ய முடிவு
செய்தோம். இதற்கு திருச்சியில் வசதி இல்லாததால் கண்களை மட்டும் தானம்
அளித்தோம்’ என்றார்.
கண்தான ஊக்குவிப்பாளர் செல்வராஜ் கூறுகையில், ‘105
வயதுடைய முதியவரின் கண்களைகூட தானமாக பெற்றிருக்கிறோம். இப்போதுதான்
பிறந்து 5 மணி நேரமான குழந்தையின் கண்களை தானமாக பெறுகிறோம்’ என்றார்.