சாமியார் இறுகப் பிடிப்பார்! (ஒரு பக்கக் கதை)

by **Dr.S.Soundarapandian** Fri Jun 11, 2021 11:28 am

அந்த அறையில் ஒரு சாமியார்!
பணியாளரைக் கூப்பிட்டார் அவர். ‘ஒரு சாமான் வாங்கணும்; பணம் தருகிறேன்; கொஞ்சம் வெளியே இரு பணத்தை எடுக்கிறேன்’ என்று சொல்லி அவனை வெளியே அனுப்பினார். ‘பணத்தை எடுப்பதை நான் பார்க்கக் கூடாதாக்கும்’ என்று முணகிக் கொண்டே வெளியே போனான். கொஞ்ச நேரத்தில், சாமியார் கூப்பிட்டார்; ‘இந்த நோட்டுக்கட்டுப் பின்னை எடுக்க முடியவில்லை, நீ எடு’ என்று ரூபாய் நோட்டுக்கட்டை நீட்டினார். ‘சரி, கொடுங்கள்’ என்று கையை நீட்டினான் அவன் . சாமியார் கட்டின் ஒரு பகுதியை இறுகப் பிடித்துக்கொண்டு ஒரு பகுதியை மட்டும் அவனுக்குக் காட்டினார்! ‘கட்டைக் கொடுங்கள்’ என்றான் அவன். ‘ம்ஹூம். நீ இப்படியே எடு’ என்று கட்டை இறுகப் பிடித்துக்கொண்டு கூறினார். ஒருவழியாக அவன் நோட்டுக்கட்டுக் கம்பியை வெளியே எடுத்துவிட்டான் . அதன் பிறகு சாமியார் தந்த பணத்தோடு சாமான் வாங்கச் சென்ற அப் பணியாளர் , அங்கிருந்தோரிடம் சிரித்துக்கொண்டே நடந்ததைக் கூறினான். கேட்டவர்கள், ‘சாமியார் உலகத்தைத் துறந்தவர் அப்பா! அவர் அப்படித்தான் இறுகப் பிடிப்பார்!’ என்றனர்!