எடப்பாடி நடத்தும் சீக்ரெட் பேசுவார்த்தை: ஓபிஎஸ் டீம் ஜெர்க்!

தமிழக சட்டமன்றத் தேர்தலில் திமுக வெற்றி பெற்று ஸ்டாலின் முதல்வராகியுள்ளார். அதிமுக படு தோல்வி அடையும். திமுக எளிதாக வெற்றி பெற்று விடும் என்று கணிக்கப்பட்ட நிலையில், அதுபோன்று எதுவும் நடக்கவில்லை. ஓரளவுக்கு நாகரீகமாக தோல்வியையே அதிமுக சந்தித்துள்ளது. குறிப்பாக, கொங்கு மண்டலம், வட மாவட்டங்களில் திமுகவுக்கு பெரும் சவாலாக அதிமுக இருந்தது.

இதற்கெல்லாம் காரணம் ஈபிஎஸ் வகுத்த வியூகங்கள்தான் என்று குதூகலிக்கிறார்கள் அவரது ஆதரவராளர்கள். இதனை காரணமாக வைத்தே எதிர்க்கட்சித் தலைவர் பதவியையும் அவர் எளிதாக கைபற்றி விட்டார். தேர்தல் தோல்வி குறித்து எவ்வித கருத்தையும் இதுவரை தெரிவிக்காத எடப்பாடி பழனிசாமி, ஆளுங்கட்சியை தாக்கும் வகையில் சில அறிக்கைகளை மட்டுமே வெளியிட்டு வருகிறார். அத்துடன், எதிர்க்கட்சி தலைவராகி விட்டது திருப்தி என்றாலும், அது கடுமையான போராட்டத்துக்கு பின்னரே கிடைத்ததால் அதனை அவர் ரசிக்கவில்லையாம்.

எடப்பாடி பழனிசாமி முன்பு தற்போது உள்ள இரண்டு சவாலான விஷயங்களின் ஒன்று மாபெரும் மக்கள் தலைவராக உருவாகி அடுத்த தேர்தலில் ஆட்சியை கைபற்றுவது. மற்றொன்று கட்சியை இரட்டை தலைமையில்லாமல் ஈபிஎஸ் என்கிற ஒற்றை தலைமையின் கீழ் கொண்டு வருவது. மாபெரும் தலைவராக உருவாவதற்கு கட்சி தனது கட்டுப்பாட்டில் முழுமையாக இருக்க வேண்டும் என்று எடப்பாடி பழனிசாமி திடமாக நம்புவதாக கூறப்படுகிறது.

இதற்காக கடந்த தேர்தலில் தனக்கு வியூகம் வகுத்து தந்த சுனில் டீம், தனக்கு ஆதரவாக இருந்து வழிகாட்டிய முன்னாள், இந்நாள் அதிகாரிகள் ஆகியோருடன் எடப்பாடி பழனிசாமி ரகசிய பேச்சுவார்த்தை நடத்தி வருவதாக தெரிகிறது. அடுத்த தேர்தல் வரை காத்திருக்காமல் தற்போதே அதற்கான பணிகளை துவங்க வேண்டும் என்பதில் எடப்பாடி பழனிசாமி கராராக இருப்பதால் இந்த பேச்சுவார்த்தைகள் விறுவிறுப்படைந்துள்ளதாக கூறுகிறார்கள் விவரம் அறிந்தவர்கள்.
ஆட்சியை பிடிக்க இப்படி ஒரு திட்டம் என்றால், கட்சியை முழுமையாக கைப்பற்றவும் மற்றொருபுறம் எடப்பாடி பழனிசாமி வியூகம் வகுத்து வருகிறார். கொங்கு மண்டலத்தில் ஈபிஎஸ் பின்னால் அனைவரும் ஏற்கனவே அணிவகுத்து நிற்கும் நிலையில், மற்ற அனைத்து மாவட்டங்களிலும் மூத்த நிர்வாகிகளை சரிகட்டும் முயற்சிகளும் நடைபெற்று வருகிறதாம். அதன் பிண்ணனியிலேயே முன்னாள் அமைச்சர் நிலோபர் கபில் நீக்கமும் அரங்கேறியதாக கூறுகிறார்கள். எடப்பாடி பழனிசாமியின் இத்தகைய திட்டங்கள் ஓபிஎஸ் காதுகளுக்கும் செல்லாமல் இல்லை. இதனையறிந்த ஓபிஎஸ் உள்பட அவரது ஆதரவாளர்கள் சற்று அதிர்ச்சியில் உள்ளனராம். எனவே, ஈபிஎஸ் ஆட்டத்தை சரிகட்ட சசிகலாவை கட்சிக்குள் கொண்டு வரும் முயற்சிகளில் ஓபிஎஸ் ஈடுபட்டுள்ளாராம்.

நன்றி சமயம்

சமாதியில் தியானம் செய்து சசிகலாவை எதிர்த்தவர்தானே இவர் என்பதை சசிகலா மறந்துவிடுவாரோ என்ன!!! தன்னால் எடப்பாடியிடம் பப்பு வேகவில்லை அதனால் சசிகலாவை நாடுகிறாரோ என்னே பச்சோந்தி தனம் சுயநல வாதியான ஓபிஎஸ்சுக்கு .என்னே நல்ல எண்ணம் பாருங்களேன். கெடுவான் கேடுநினைப்பான் ....நல்லவன் வாழனும் ...இறைவன் அருளனும்.துணை இருக்கனும்..