இசைஞானி இளையராஜாவின் மகள் பவதாரிணி உடல் நலக்குறைவால் காலமானார்.

**ayyasamy ram** · **ayyasamy ram** Fri Jan 26, 2024 8:28 am

-
தமிழ் மற்றும் தெலுங்கு சினிமாவில் பிரதானமாக இசையமைப்பாளராக பல படங்களில் இசையமைத்து வருகிறார் இசைஞானி இளையராஜா. இசைஞானி இளையராஜாவிற்கு உலகம் தழுவி பல கோடி ரசிகர்கள் இருக்கிறார்கள்.

இசைஞானி இளையராஜாவின் குடும்பத்தினர் முழுவதுமே கலைத்துறையில் சாதித்து வருகிறார்கள். இசைஞானி இளையராஜாவிற்கு கார்த்திக் ராஜா, யுவன் சங்கர் ராஜா, பவதாரிணி என மூன்று பிள்ளைகள் இருக்கிறார்கள். இசைஞானிக்கு இருக்கும் இசைஞானம் இவரது மூன்று பிள்ளைகளுக்குமே இருக்கிறது.
-

இசைஞானி இளையராஜாவின் மகள் பவதாரிணி உடல் நலக்குறைவால் காலமானார். Samayam-tamil-107153383

-

இந்த வகையில் கார்த்திக் ராஜா ஒரு சில படங்களுக்கு இசையமைத்து பின்னணி பாடகராக பணியாற்றி இருக்கிறார். அதேபோல அவரது இரண்டாவது மகனான யுவன் சங்கர் ராஜா தற்போதுவரை தமிழ் சினிமாவில் முக்கிய மற்றும் முன்னணி இசையமைப்பாளராக பணியாற்றி வருகிறார். இளையராஜாவின் மகளும் எக்கச்சக்கமான திரைப்படங்களில் பின்னணி பாடகியாகவும் சில படங்களுக்கு இசையமைத்து இசையமைப்பாளராகவும் இருந்திருக்கிறார்.
-
47 வயதான இளையராஜாவின் மகள் பவதாரணிக்கு கடந்த சில மாதங்களாகவே உடல் நலத்தில் பின்னடைவு ஏற்பட்டு இருக்கிறது. புற்றுநோய் பாதிக்கப்பட்ட இவர் இயற்கை மருத்துவ சிகிச்சைக்காக இலங்கைக்கு சென்றிருக்கிறார்.

சிகிச்சைக்காக இலங்கை சென்று இருந்த பவதாரிணி சிகிச்சை பலனின்றி இன்று மாலை 5 மணி அளவில் காலமானார். இவரது மறைவு திரைத்துறையினர் மத்தியில் மிகுந்த அதிர்ச்சியை ஏற்படுத்தியிருக்கிறது. 2000த்தில் இசைஞானி இளையராஜா இசையமைப்பில் பாரதி திரைப்படத்தில் இவர் பாடிய 'மயில் போல பொண்ணு ஒன்னு' பாடலுக்காக சிறந்த பின்னணி பாடகிக்கான தேசிய விருதையும் பவதாரிணி வாங்கி இருந்தார் என்பது குறிப்பிடத்தக்கது.
-
நன்றி- சமயம்-செய்திகள்