அமெரிக்கா அனுப்பிய 318 ஆக்சிஜன் செறிவூட்டிகள்; இந்தியா வந்தடைந்தது

புதுடில்லி:
இந்தியாவில் கொரோனா பரவலை கட்டுப்படுத்த அமெரிக்கா
உள்ளிட்ட நாடுகள் உதவி கரம் நீட்டியுள்ளன. அதன்படி,
அமெரிக்கா சார்பில் 318 ஆக்சிஜன் செறிவூட்டிகள் அனுப்பப்பட்ட
நிலையில், அவைகள் டில்லி விமான நிலையம் வந்தடைந்தது.

இந்தியாவில் கொரோனா 2வது அலை காரணமாக லட்சக்
கணக்கான மக்கள் பாதிக்கப்பட்டு வருகின்றனர்.
இதனையடுத்து நாடு முழுவதும் ஆக்சிஜன் தேவைகள்
அதிகரித்துள்ளன. இந்தியாவின் நிலை அறிந்து பல நாடுகளும்
உதவ முன்வந்துள்ளன.

கொரோனா தடுப்பூசிக்கு தேவையான மூலப்பொருட்களை
அனுப்பி வைக்க, அமெரிக்காவுக்கு மத்திய அரசு கோரிக்கை
விடுத்தது.

இதனையடுத்து, அமெரிக்க தேசிய பாதுகாப்பு செயலாளர்
ஜேக் சலீவன், இந்திய தேசிய பாதுகாப்பு செயலாளர்
அஜீத் தோவலை நேற்று (ஏப்.,25) தொடர்பு கொண்டு பேசினார்.

அப்போது ‛கொரோனா தாக்கத்தின் ஆரம்ப காலத்தில்
அமெரிக்காவிற்கு இந்தியா எப்படி உதவியதோ அதே போன்று
இந்தியாவின் தற்போதைய நிலை கண்டு அமெரிக்கா உதவ
முடிவு செய்துள்ளதாக' தெரிவித்தார்.

இதனையடுத்து இன்று அமெரிக்காவில் இருந்து 318 ஆக்சிஜன்
செறிவூட்டிகள் அனுப்பப்பட்டு டில்லி விமான நிலையம்
வந்தடைந்தது.

அதேபோல், இங்கிலாந்து பிரதமர் போரிஸ் ஜான்சனும்
இந்தியாவிற்கு உதவ தயாராக உள்ளதாகவும், கொரோனாவுக்கு
எதிரான போரில் இந்திய அரசுக்கு பக்கபலமாக இங்கிலாந்து
துணை நிற்கும் எனவும் தெரிவித்துள்ளார்.

இதனையடுத்து இன்று இங்கிலாந்தில் இருந்து வென்டிலேட்டர்கள்
, 495 ஆக்சிஜன் செறிவூட்டிகள் போன்ற மருத்துவ உபகரணங்களை
அனுப்ப உள்ளது. இவைகள் நாளை புதுடில்லிக்கு வரும் என
எதிர்பார்க்கப்படுகிறது.

தினமலர்