புனுகுப் பூனை

தங்கள் சுயநலத்துக்காக இயற்கையை அழிப்பதே
மனித இனத் தின் வரலாறாக இருக்கிறது.
-
இனப்பெருக்கத்துக்கு உதவக்கூடிய வகையில்
புனுகுப் பூனை வெளி யிடும் ஒருவகை பிசின்
போன்ற திரவம் வாசனை மிகுந்து காணப்பட்டதால்,
அதற்காக தேடித் தேடி இந்த இனத்தை வேட்டையாடிக்
கொன்றனர் மனிதர்கள்.
இன்று அந்த இனமே அழிவின் விளிம்பில்!
-
புனுகுப் பூனைகளின் புகைப் படங்களைக்கூட இன்று
பார்க்க முடியாத நிலையில், பாடம் செய்யப்பட்ட
இந்திய மலபார் வகை புனுகுப் பூனைகளை
காட்சிப்படுத்தி பார்வையாளர்களை வாய்பிளக்க
வைத்து விட்டார்கள் சென்னை அருங்காட்சியகத்தினர்.
-
புனுகுப் பூனை குறித்து சொல்கிறார் விலங்கியல்
காப்பாட்சியர் அசோகன்.
-
‘‘இவற்றில் பன்னிரெண்டுக்கும் மேற்பட்ட வகைகள்
இருப்பதாக விலங்கியல் அறிஞர்கள் கருதுகிறார்கள்.
ஆப்ரிக்க புனுகுப் பூனைகள்தான் உலகப் பிரசித்தம்.
இந்தியாவிலும் பல வகையான புனுகுப் பூனைகள்
உண்டு.
-
மலபாரைத் தவிர்த்த மற்ற பிரதேசங்களில் சிறிய
வகையான புனுகுப் பூனைகள் இருந்தன. மலபார் வகை
புனுகுப் பூனை, ஆப்ரிக்க வகையைப் போல பெரியது.
-
வாலைத் தவிர்த்து உடல் மட்டுமே சுமார் நான்கு அடி
வரை இருக்கும். நான்கரை கிலோ வரை இதன் எடை
இருக்கும். இவற்றை ‘பெரும்புள்ளி பூனைகள்’ என்று
விலங்கியலாளர்கள் அழைப்பர்.
-
சிறிய வகை பூனைகளிலிருந்து இவை மற்ற
அடையாளங்களிலும் வித்தியாசப்படுகின்றன. இவை
மங்கிய சாம்பல் நிறத்தில் இருக்கும். அதில் இன்னும்
மங்கிய நிறத்தில் புள்ளிகளும் கோடுகளும் இருக்கும்.
முதுகுப்புறத்தில் கரிய முடி சிலிர்த்து நிற்கும்.
-
மேற்குத் தொடர்ச்சி மலைக் காடுகள்தான் இவற்றின்
வாழிடம். கடந்த 1999ம் ஆண்டு எடுத்த
கணக்கெடுப்பின்படி அங்கு இந்தப் பூனைகளின்
எண்ணிக்கை வெறும் 250 மட்டுமே!
-
இவற்றின் வாலுக்கும் குதத்துக்கும் இடையிலான
பகுதியில் இருக்கும் இரண்டு சுரப்பிகளில் சுரக்கும் ஒரு
வகை வாசனை கலந்த திரவமே புனுகு. இந்தப் பிசின்
போன்ற திரவம்தான் இவற்றின் இனப்பெருக்கத்துக்கு
உதவுகிறது.
-
இந்த வாசனைத் திரவியத்துக்காகத்தான் இவற்றை
வேட்டையாடிக் கொன்றனர். வாசனைத் திரவியங்களைத்
தயாரிப்பதற்காகவும், புகையிலைப் பொருட்களில்
வாசனையைக் கூட்டவும், இன்னும் மருத்துவத்துக்காகவும்
இவை அழித்தொழிக்கப்பட்டன.
-
ரப்பர் தோட்டங்களை உருவாக்குவதற்காக வனங்கள்
அழிக்கப்பட் டதும், இந்தப் பூனைகள் வசிப்பிடங்களை
இழந்தன. ஆபத்தான விலங்குகளுக்கு மட்டுமில்லை...
அதிசயமான விலங்குகளுக்கும் மனிதனால் ஆபத்து
என்பது இந்தப் பூனைகளின் அழிவிலிருந்து தெரிகிறது.
-
வாசனைக்காக புனுகுப் பூனையின் வாசனையே
இல்லாமல் செய்தது துரதிர்ஷ்டமானதுதான்!’’
-
- டி.ரஞ்சித்
படங்கள்: ஆர்.சி.எஸ்
நன்றி-குங்குமம்