வேளச்சேரியில் விதிமீறல்: சத்யபிரதா சாஹூ தகவல்

**T.N.Balasubramanian** · **T.N.Balasubramanian** Fri 9 Apr 2021 - 18:36

சென்னை: வேளச்சேரியில், விவிபேட் இயந்திரம் இரு சக்கர வாகனத்தில் கொண்டு செல்லப்பட்டது விதிமீறல் என தமிழக தலைமை தேர்தல் அதிகாரி சத்யபிரதா சாஹூ தெரிவித்து உள்ளார்.

சென்னை, வேளச்சேரி சட்டசபை தொகுதியில், 261 ஓட்டுச்சாவடிகள் உள்ளன. கொரோனா பாதிப்பால், 459 ஓட்டுச்சாவடிகளாக அதிகரிக்கப்பட்டுள்ளன. கடந்த 6ம் தேதி, தொகுதியில் ஓட்டுப்பதிவு அமைதியாக நடந்தது. வேளச்சேரி, டான்சி நகரில் உள்ள ஒரு தனியார் பள்ளியில், 93வது ஓட்டுச்சாவடிக்கான ஓட்டுப்பதிவு நடந்தது.மாலை, 7:30 மணிக்கு, இந்த ஓட்டுச்சாவடியில் இருந்து, மூன்று ஊழியர்கள் சேர்ந்து, இரு ஓட்டுப்பதிவு இயந்திரங்கள், ஒரு கட்டுப்பாட்டு இயந்திரம் மற்றும் ஒரு வி.வி.பி.ஏ.டி., இயந்திரம் ஆகியவற்றை, இரு இருசக்கர வாகனத்தில்வைத்து எடுத்துச் சென்றனர்.
ஓட்டுச்சாவடியில் இருந்து, 200 அடி துாரத்தில் செல்லும் போது, அவர்களை, பொதுமக்கள் பிடித்து போலீசில் ஒப்படைத்தனர். கட்சியினர், ஓட்டுப்பதிவு இயந்திரங்களை கடத்தியதாக, மறியல் செய்தனர்.வேளச்சேரி போலீசார், இயந்திரங்களை மீட்டு, அதை கொண்டு சென்ற நபர்களை மடக்கி பிடித்தனர். தேர்தல் நடத்தும் அதிகாரிகள், அவர்களிடம் விசாரணை நடத்தினர். இந்த சம்பவம் தொடர்பாக 3 பேர் சஸ்பெண்ட் செய்யப்பட்டு உள்ளனர்.

இது தொடர்பாக தமிழக தலைமை தேர்தல் அதிகாரி சத்யபிரதா சாஹூ கூறியதாவது: இரு சக்கர வாகனத்தில் எடுத்து செல்லப்பட்ட விவிபேட் இயந்திரத்தில் 15 ஓட்டுகள் பதிவாகி இருந்தன. ஓட்டுச்சாவடியில் ஓட்டுப்பதிவுக்காக 50 நிமிடங்கள் பயன்படுத்தப்பட்டு உள்ளது. பிறகு, விவிபேட்டில் கோளாறு ஏற்பட்டதால், வேறு விவிபேட் மாற்றப்பட்டு உள்ளது.
சம்பந்தப்பட்ட ஓட்டுச்சாவடியில் 200 ஓட்டுகள் இருக்கும் நிலையில், இந்த இயந்திரத்தில் 15 ஓட்டுகள் பதிவாகி உள்ளது. இரு சக்கர வாகனத்தில் விவிபேட் எடுத்து சென்றது விதிமீறல். எனவே, வேளச்சேரி ஓட்டுச்சாவடியில் மறு ஓட்டுப்பதிவு நடத்துவது குறித்து தேர்தல் ஆணையம் தான் நடவடிக்கை எடுக்கும். இரு சக்கர வாகனத்தில் இயந்திரங்கள் மற்றும் விவிபேட் கொண்டு செல்லப்பட்டது குறித்து தேர்தல் ஆணையத்திற்கு அறிக்கை அனுப்பப்பட்டு உள்ளது. இவ்வாறு அவர் கூறினார்.

நன்றி தினமலர்

**T.N.Balasubramanian** · **T.N.Balasubramanian** Fri 9 Apr 2021 - 18:53

மறு வாக்கு பதிவு நடத்துவதா ?
வீண் செலவு.
மொத்தமே 15 ஓட்டுகள் பதிவான நிலையில்,
வாக்குகள் எண்ணும் தினத்தில் ஜெயிக்கும் வேட்பாளருக்கும்
அதற்கு அடுத்து வருபவருக்கும் எண்ணிக்கையில் வித்தியாசம் 15 க்கு
குறைவாக இருந்தால் மட்டும் இந்த 15 வாக்குகளை எவருக்கு விழுந்திருக்கு என்று
பார்த்து கூட்டிக்கொள்ளலாம்.
எனக்கு தோன்றியது.
தேர்தல் விதிமுறைகள் சாஹு அய்யா அவர்கள்தான் தீர்மானிக்கவேண்டும். புன்னகை