ஜம்முவில் ஸ்ரீவெங்கடாஜலபதி

ஜம்முவில் ஏழுமலையான் கோயில் கட்டுவதற்காக யூனியன் பிரதேச நிர்வாகம் எடுத்துள்ள நடவடிக்கை மிகுந்த முக்கியத்துவம் பெற்றுள்ளது.

ஆந்திர மாநிலம் திருப்பதி திருமலையில் ஏழுமலையான் கோயில் அமைந்துள்ளது. இங்கு நாள்தோறும் பல்லாயிரக்கணக்கான பக்தர்கள் வருகை தந்து சாமி தரிசனம் செய்கின்றனர். இவர்கள் வாரி வழங்கும் நன்கொடைகளால் உலகின் பணக்கார கடவுளாக ஏழுமலையான் திகழ்கிறார். இந்த கோயிலை TTD எனப்படும் திருமலை திருப்பதி தேவஸ்தானம் நிர்வகித்து வருகிறது.

திருமலை மட்டுமின்றி நாட்டின் பல்வேறு பகுதிகளில் நலத்திட்டங்களை TTD செயல்படுத்தி வருகிறது. இந்நிலையில் திருமலையில் இருப்பதைப் போன்றே பிரம்மாண்ட கோயிலை ஜம்மு காஷ்மீரில் கட்டுவதற்கு தேவஸ்தான நிர்வாகம் நடவடிக்கை எடுத்தது. இதற்கு ஜம்மு காஷ்மீர் யூனியன் பிரதேச நிர்வாகமும் ஒப்புதல் அளித்தது. இந்த கோயில் கட்டுவதற்கான இடத் தேர்வு இறுதி செய்யப்பட்ட நிலையில், அடுத்தகட்ட நடவடிக்கைகள் முடுக்கி விடப்பட்டுள்ளன.

நிலம் ஒதுக்க அரசு அனுமதி
அதன்படி, மஜீன் கிராமத்தில் உள்ள 62 ஏக்கர் நிலம் திருப்பதி தேவஸ்தான நிர்வாகத்திடன் ஒப்படைக்கப்பட்டிருக்கிறது. கடந்த ஒன்றாம் தேதி ஜம்மு காஷ்மீர் துணை நிலை ஆளுநர் மனோஜ் சின்ஹா தலைமையில் கவுன்சில் கூட்டம் நடைபெற்றது. அதில் ஸ்ரீநகர் - பதான்கோட் நெடுஞ்சாலையை ஒட்டி சித்ரா பைபாஸ் பகுதியில் கோயில் கட்டுவதற்கான நிலத்தை தேவஸ்தான நிர்வாகத்திடம் ஒப்படைக்க அனுமதி அளிக்கப்பட்டது.

40 ஆண்டுகள் குத்தகை
-கோயிலை ஒட்டி கட்டப்படும் கட்டிடங்கள் மற்றும் வசதிகள் 40 ஆண்டுகள் குத்தகைக்கு விடப்படுவதாக அறிவிக்கப்பட்டது. இதையடுத்து பிறப்பிக்கப்பட்ட உத்தரவில், ஜம்முவில் உள்ள மஜீன் கிராமத்தில் உள்ள 62.02 ஏக்கர் நிலம் திருப்பதி தேவஸ்தானத்திற்கு வழங்கப்படுகிறது. இந்த இடத்தில் தேவஸ்தானம் கோயில் கட்டிக் கொள்ளலாம்.

பக்தர்களுக்கு பல்வேறு வசதிகள்
கோயிலை ஒட்டி அமையவுள்ள பக்தர்கள் தங்குமிடங்கள், வேத பாடசாலை, தியான மையம், அலுவலகம், ஊழியர்கள் குடியிருப்பு, பார்க்கிங் உள்ளிட்டவை 40 ஆண்டுகள் குத்தகை அடிப்படையில் வழங்கப்படுகிறது. இது சம்பந்தப்பட்ட நிலத்தை கையகப்படுத்தும் நாளில் இருந்து கணக்கிடப்படும். சம்பந்தப்பட்ட நிலம் எதற்காக வழங்கப்பட்டதோ, அதைத் தவிர வேறு எதற்காகவும் பயன்படுத்தக் கூடாது.

நன்றி சமயம்