கொரோனா கட்டுப்பாடு நீடித்தாலும் மின்சார ரெயில்களில் தினமும் 3 லட்சம் பேர் பயணம்

சென்னை:

கொரோனா இன்னும் நீடித்து வருவதால் மின்சார ரெயில்கள், பணி செய்வோருக்கான சிறப்பு ரெயில்களாகவே இயக்கப்பட்டு வருகின்றன. ஆனால் கொரோனாவுக்கு முந்தைய காலத்தில் எந்த அளவு மின்சார ரெயில்கள் இயக்கப்பட்டதோ அந்த அளவிற்கு தற்போது மின்சார ரெயில்கள் முழுமையாக இயக்கப்படுகின்றன.

அதிகாலை 4 மணி முதல் நள்ளிரவு 12 மணிவரை சென்ட்ரல், கடற்கரை, தாம்பரம், செங்கல்பட்டு, கும்மிடிப்பூண்டி, அரக்கோணம், வேளச்சேரி ஆகிய வழித்தடங்களில் 600 மின்சார ரெயில்கள் இயக்கப்படுகின்றன. தினமும் 3 லட்சம் பயணிகள் பயணம் செய்கின்றனர். கொரோனாவுக்கு முன்பு எந்த அளவு மக்கள் பயணம் செய்தார்களோ அந்த அளவுக்கு தற்போது பயணம் செய்ய தொடங்கிவிட்டனர்.

ஆனாலும் கொரோனா கட்டுப்பாடு காரணமாகவே இன்னும் விதிமுறைகள் ரெயில்நிலையங்களிலும், ரெயில்களிலும் பின்பற்றப்படுகின்றன. காலை மற்றும் மாலை அலுவலக நேரங்களில் மட்டும் இன்னும் பொதுமக்களுக்கு அனுமதி வழங்கப்படவில்லை. சீசன் டிக்கெட் உள்ளிட்ட அனைத்து டிக்கெட்டுகளும் வினியோகிக்கப்படவில்லை.

அரசு மற்றும் தனியார் நிறுவனங்களில் பணி செய்யக்கூடியவர்கள், கூலி தொழிலாளர்கள், பெண்கள் உள்ளிட்டவர்கள் மின்சார ரெயில்களில் பயணம் செய்து வருகிறார்கள்.

கொரோனா தொற்று காலம் நீடித்து வருவதால் கொரோனா தடுப்பு விதிமுறைகள் பின்பற்றப்படுகின்றன. முககவசம் அணிந்து ரெயில்களில் பயணிக்க வேண்டும். சமூக இடைவெளியும் பின்பற்றப்படுகிறது.

‘பீக் அவர்ஸ்’ கட்டுப்பாடு மட்டுமே தற்போது நீடித்து வருகிறது. அந்த நேரத்தில் பொதுவான பயணிகளுக்கு அனுமதி இல்லை. ஆனாலும் அனைத்து ரெயில் சேவையும் வழக்கம் போல் இயங்கி வருகின்றன. தினமும் சுமார் 3 லட்சம் பயணிகள் பயணம் செய்கின்றனர்.

இதுவரையில் சிறப்பு ரெயில்களாக இயக்கப்படுகின்றன. ஆனால் வழக்கமான சேவைகள் நடைபெறுகின்றன.

இவ்வாறு அவர்கள் கூறினர்.

மாலைமலர்