ஓ.பி.எஸ்., வீட்டில் இ.பி.எஸ்.,; போட்டோ வெளியான பின்னணி

-
துணை முதல்வர் ஓ.பி.எஸ்., மற்றும் முதல்வர் இ.பி.எஸ்., இடையே நிலவி வரும் கருத்து மோதல்களுக்கு முற்றுப்புள்ளி வைக்கப்பட்டிருப்பதாக, ஒரு சம்பவத்தை மேற்கோள் காட்டி உற்சாகமாக பேசுகின்றனர், அ.தி.மு.க,,வினர்.
-
இருவருக்கும் இடையே நிலவும் மோதலை வைத்து, கட்சியில் சிலர் அரசியல் செய்கின்றனர் என்ற தகவல், முதல்வருக்கு கிடைத்தது. தனது ஆதரவாளராக உள்ள அமைச்சர்கள் சிலரும் இந்த விஷயத்தில் தீவிர ஆர்வம் காட்டி, விஷயங்களை ஊதிப் பெரிதாக்கும் விஷயம் அவர் கவனத்துக்கு வந்தது. இந்த நிலையில் தான், சேலத்தில் இருவரும் நேரில் சந்தித்து மனம் விட்டு பேசினர். பல விஷயங்களை தெளிவுபடுத்திக் கொண்டனர். அப்போது, ஓ.பி.எஸ்., 'தேனி மாவட்ட பிரசாரத்துக்கு வரும்போது, கட்டாயம் என் வீட்டுக்கு வர வேண்டும்' என சொல்ல, 'வந்தாப் போச்சு...' என, இ.பி.எஸ்., சொல்லியிருக்கிறார்.

அதையடுத்து, தேனி மாவட்ட பிரசாரத்தின்போது ஓ.பி.எஸ்., போட்டியிடும் போடி தொகுதிக்கு முதல்வர் போனார். தொகுதிக்காக துணை முதல்வர் நிறைவேற்றிய திட்டங்கள் அனைத்தையும் வரிசையாக சொன்னவர், 'இறைவனால் உங்களுக்கு அருளப்பட்ட கொடைதான் அண்ணன் ஓ.பி.எஸ்., அவர் எங்களுக்கும் கிடைத்த பெரும் பாக்கியம்' என, ஏகத்துக்கும் புகழ, அருகில் நின்ற ஓ.பி.எஸ்.,சும் உருகி விட்டார்.
-


பிறகுதான் சுப்புராஜ் நகரில் உள்ள தனது வீட்டுக்கு இ.பி.எஸ்.,சை அழைத்துப் போனார். அப்போது இரவு, 9:00 மணி. ஓ.பி.எஸ்.,சின் இரு மகன்கள், மருமகள்கள், பேரப் பிள்ளைகள் என, எல்லோரும் முதல்வரை வரவேற்றனர். நடமாட முடியாமல் உள்ளே அமர்ந்திருந்த தாய் பழனியம்மாவை துணை முதல்வர் அறிமுகம் செய்தார். 'முதலமைச்சர் பழனிசாமி வந்திருக்கார்' என, அம்மாவிடம் மகன் சொல்ல, பழனியம்மாள் கை உயர்த்தி ஆசி வழங்கினார். காலைத் தொட்டு வணங்கிய முதல்வருக்கு திருநீறு பூசி வாழ்த்தினார்.

அந்தப் படம் வெளியாகி சமூக ஊடகங்களில் வேகமாக பரவியதை தொடர்ந்து, அ.தி.மு.க.,வில் கோஷ்டிக் குரல்கள் அடங்கியதோடு, முதல்வருக்கும், துணை முதல்வருக்கும் பதவிச் சண்டை என, தி.மு.க., செய்துவந்த பிரசாரமும் முடங்கி இருக்கிறது.
-
தினமலர்