குடியரசு தலைவர் ராம்நாத் கோவிந்த் உடன் மத்திய அமைச்சர் ராம்தாஸ் அத்வாலே சந்திப்பு

-

மும்பையில் பிரபல தொழில் அதிபர் முகேஷ் அம்பானி வீட்டு
அருகே கடந்த மாதம் வெடிகுண்டு கார் மீட்கப்பட்டது. இந்த
விவகாரத்தில் இடமாற்றம் செய்யப்பட்ட முன்னாள் போலீஸ்
கமிஷனர் பரம்பீர் சிங், சமீபத்தில் முதல்-மந்திரி
உத்தவ் தாக்கரேக்கு எழுதிய கடிதம் மராட்டிய அரசியலில் புயலை
கிளப்பி உள்ளது.
-
உள்துறை மந்திரி அனில் தேஷ்முக் மாதந்தோறும் ரூ.100 கோடி வசூலித்து
தருமாறு கூறியதாக அந்த கடிதத்தில் பரம்பீர் சிங் குற்றம் சாட்டியிருந்தார்.
-
இதேபோல் போலீசார் பணி இடமாற்றம் மற்றும் நியமனத்தில் ஊழல்
நடந்திருப்பதாக முன்னாள் முதல்-மந்திரி தேவேந்திர பட்னாவிஸ்
குற்றம் சாட்டியுள்ளார். இந்த விவகாரம் புயலை கிளப்பியுள்ள நிலையில்
மந்திரி அனில் தேஷ்முக் மீது நடவடிக்கை எடுக்கக்கோரி பா.ஜனதா உள்ளிட்ட
எதிர்க்கட்சிகள் தொடர்ந்து போராட்டம் நடத்தி வருகின்றன.
-
இந்த பரபரப்பான சூழ்நிலையில் சட்டசபை எதிர்க்கட்சி தலைவரும்,
முன்னாள் முதல்-மந்திரியுமான தேவேந்திர பட்னாவிஸ் தலைமையில்
முன்னாள் நிதி மந்திரி சுதிர் முங்கண்டிவார், பா.ஜனதா மும்பை பிரிவு
தலைவர் மங்கள் பிரதாப் லோதா மற்றும் எம்.எல்.ஏ. ஆசிஷ் செலார்
உள்ளிட்ட பா.ஜனதா தலைவர்கள் கவர்னர் பகத்சிங் கோஷ்யாரியை
நேற்று மும்பை ராஜ்பவனில் சந்தித்தனர்.
-
அப்போது அமைச்சர் அனில் தேஷ்முக், மும்பையில் மாதந்தோறும்
ரூ.100 கோடி மாமூல் வசூலிக்க சொன்னதாக புகார் எழுந்துள்ளநிலையில்
இதுபற்றி விரிவான விசாரணை நடத்த வேண்டும் என வலியுறுத்தினர்.
மேலும் ஜனாதிபதி ராம்நாத் கோவிந்துக்கு சட்டம்-ஒழுங்கு குறித்த விரிவான
அறிக்கையை அனுப்பி வைக்க வேண்டும் எனவும் வலியுறுத்தி மனு அளித்தனர்.
-
இந்நிலையில் குடியரசு தலைவர் ராம்நாத் கோவிந்த் உடன் மத்திய அமைச்சர்
ராம்தாஸ் அத்வாலே இன்று சந்தித்து பேசினார்.

ஜனாதிபதி மாளிகையில் நடந்த இந்த சந்திப்பில் மராட்டியத்தில் குடியரசுத்
தலைவர் ஆட்சியை அமல்படுத்த ராம்நாத் கோவிந்திடம் மத்திய அமைச்சர்
ராம்தாஸ் அத்வாலே கோரிக்கை விடுத்துள்ளார்.

மராட்டியத்தில் மாநில அரசை கவிழ்த்துவிட்டு ஜனாதிபதி ஆட்சியை
கொண்டுவர பா.ஜனதா திட்டமிடுவதாக ஏற்கனவே ஆளும் கட்சிகள்
குற்றம்சாட்டி வருவது குறிப்பிடத்தக்கது.
-
தினத்தந்தி