அரவக்குறிச்சியில் பாஜக வேட்பாளர் அண்ணாமலை வேட்புமனு நிறுத்திவைப்பு/ஏற்பு

**ayyasamy ram** · **ayyasamy ram** Sat Mar 20, 2021 3:47 pm

சென்னை:
அரவக்குறிச்சி தொகுதியில் பாஜக வேட்பாளர் அண்ணாமலை
வேட்புமனு நிறுத்தி வைக்கப்பட்டுள்ளது. 10க்கும் மேற்பட்ட
வழக்குகள் இருப்பதை மறைத்திருப்பதாக புகார் எழுந்ததால்
அண்ணாமலை வேட்புமனு நிறுத்திவைக்கப்பட்டுள்ளது.

அரவக்குறிச்சி சட்டப்பேரவை தொகுதி தேர்தலுக்காக
46 பேர் வேட்புமனுக்கள் தாக்கல் செய்திருந்த நிலையில் இந்த
வேட்புமனுக்கள் மீதான பரிசீலனை இன்று நடைபெற்று வருகிறது.

இதில் பாஜக சார்பில் போட்டியிடும் முன்னாள் ஐபிஎஸ் அதிகாரி
அண்ணாமலையின் வேட்புமனுவில் பாகம் 19 பகுதி பி - காலம் 5ல்
நிலுவையில் உள்ள குற்றவழக்குகள் எதுவும் இல்லை என
பதிவிட்டுள்ளார். ஆனால் அவர் மீது 10க்கும் மேற்பட்ட வழக்குகள்
இருப்பதாக சுயேச்சை வேட்பாளர்கள் மற்றும் வழக்கறிஞர்கள்
குழுவினர் அவரது மனுவை நிராகரிக்க வேண்டும் என்று எதிர்ப்பு
தெரிவித்தனர்.

இதை தொடர்ந்து அண்ணாமலை மற்றும் அவரது மாற்று
வேட்பாளருடைய மனுக்களை நிறுத்திவைத்துள்ளனர்.
-
தினகரன்

**T.N.Balasubramanian** · **T.N.Balasubramanian** Sat Mar 20, 2021 5:12 pm

அரவக்குறிச்சி வேட்பாளர் அண்ணாமலை வேட்பு மனுவில் பிரச்சினை: விளக்கத்துக்குப் பின் ஏற்பு

தமிழக சட்டப்பேரவைத் தேர்தலை ஒட்டி வேட்புமனுத் தாக்கல் முடிந்து வேட்புமனு பரிசீலனை இன்று நடக்கிறது. இதில் அரவக்குறிச்சியில் பாஜக வேட்பாளராகப் போட்டியிடும் அண்ணாமலையின் வேட்புமனு பரிசீலனை எதிர்க்கட்சிகள் ஆட்சேபத்தால் நிறுத்தி வைக்கப்பட்டது. விளக்கம் அளிக்கப்பட்ட பிறகு, மனு ஏற்கப்பட்டது.

தமிழக பாஜகவில் கடந்த ஆண்டு இணைந்தவர் அண்ணாமலை. ஐபிஎஸ் அதிகாரியாக கர்நாடகத்தில் துணை ஆணையராகப் பணியாற்றினார். பின்னர் பொதுச்சேவை செய்வதற்காகத் தனது ஐபிஎஸ் பதவியை உதறிவிட்டு தமிழகம் வந்து ஒரு அமைப்பைத் தொடங்கி சேவை செய்து வந்தார்.
ரஜினிகாந்த் கட்சி ஆரம்பித்தால் அதில் இவர்தான் முதல்வர் வேட்பாளர் என்றெல்லாம் பேசப்பட்டது.
ஆனால், திடீரென அண்ணாமலை பாஜகவில் இணைந்தார். அவருக்கு மாநிலத் துணைத் தலைவர் பதவி அளிக்கப்பட்டது. சட்டப்பேரவைத் தேர்தலில் அரவக்குறிச்சி தொகுதியில் அண்ணாமலை போட்டியிடுகிறார். தான் போட்டியிடும் அரவக்குறிச்சியில் சமீபத்தில் அண்ணாமலை வேட்புமனுத் தாக்கல் செய்தார்.
இந்நிலையில் இன்று வேட்புமனு பரிசீலனை நடந்தது. அரவக்குறிச்சி பாஜக வேட்பாளர் அண்ணாமலை தன் மீதுள்ள குற்ற விவரங்களைத் தாக்கல் செய்யவில்லை என எதிர்க்கட்சியினர் ஆட்சேபம் தெரிவித்தனர். இதனால் அவரது மனுவைத் தேர்தல் அதிகாரிகள் நிறுத்திவைத்தனர்.

அண்ணாமலை மீது 10க்கும் மேற்பட்ட வழக்குகள் உள்ளன. அதுகுறித்த விவரங்களை அவர் மனுவில் குறிப்பிடவில்லை என எதிர்க்கட்சியினர், சுயேச்சை வேட்பாளர் உள்ளிட்டோர் தேர்தல் அதிகாரியிடம் கூறி நிராகரிக்கக் கோரியதாகத் தகவல் வெளியானது.
அண்ணாமலை தற்போது பிரச்சாரத்தில் உள்ளார் என்பதால், அவரிடம் தகவல் தெரிவிக்கப்பட்டு உரிய விளக்கம் அளிக்கப்பட்டது. இதன் பின்னர் அவரது வேட்புமனு ஏற்கப்பட்டதாகத் தகவல் வெளியாகியுள்ளது.

நன்றி தமிழ் ஹிந்து