தேமுதிகவின் பிரசாரத்தைப் பார்த்து பயந்து போய்க் கிடக்கும் திமுக, அதிமுக: விஜயகாந்த்

லால்குடி: தமிழகத்தில் சிறப்பாக செயல்பட்டு வந்தது காவல்துறை. ஆனால் இந்த திமுகவும், அதிமுகவும் ஆட்சிக்கு வந்த பின்னர் காவல்துறையை சீர்குலைத்து விட்டனர். தேமுதிகவின் பிரசாரத்தைப் பார்த்து திமுகவும், அதிமுகவும் பயந்து போய்க் கிடக்கின்றன என்று தேமுதிக தலைவர் விஜயகாந்த் கூறியுள்ளார்.

சூறாவளி சுற்றுப்பயணத்தில் இருக்கும் விஜயகாந்த் நேற்று பெரம்பலூர் மக்களவைத் தொகுதி வேட்பாளர் துரை. காமராஜை ஆதரித்து லால்குடி, குளித்தலை உள்ளிட்ட பகுதிகளில் பிரசாரம் செய்தார்.

அப்போது அவர் பேசுகையில்,

திமுக, அதிமுக ஆகியவற்றின் கூட்டணியோடு மத்தியில் பாரதிய ஜனதா, காங்கிரஸ் கட்சிகள் ஆட்சி செய்தன. இருந்தாலும், காவிரி நீர் பிரச்னை தீர்க்கப்படவில்லை.

திமுக அரசு மாணவர்களின் நலனிலும், பொதுமக்களின் சுகாதாரத்திலும் அக்கறை செலுத்தவில்லை. பெரும்பாலான அரசுப் பள்ளிகளின் கட்டடங்கள் தரமாக இல்லை. அரசு மருத்துவமனைகளில் பாம்பு, வெறிநாய்க் கடிக்கு மருந்துகள் தட்டுப்பாடாக உள்ளன.

கோதுமைக்கு கொள்முதல் விலையை உயர்த்திய அரசு, கரும்புக்கு விலையை உயர்த்தவில்லை. மாணவர்களுக்கு பெரும்பாலான வங்கிகள் கல்விக் கடன் தருவதில்லை.

கூட்டுறவுக் கடன் தள்ளுபடியில் திமுகவினர் பொய்யான தகவல்களைக் கொடுத்து, கடன் தள்ளுபடி பெற்றனர். உண்மையான விவசாயிகள் கடனைத் திரும்பச் செலுத்தியும் அவர்களால் மீண்டும் கடன் பெற முடியவில்லை.

பணக்கார விவசாயிகள் தான் கடன் தள்ளுபடி பெற்றிருக்கிறார்களே தவிர ஏழை விவசாயிகள் பயன்பெறவில்லை.

சுதந்திரம் அடைந்து 60 ஆண்டுகள் ஆகி விட்டது. இன்னும் மரத்தடியில்தான் ஏழை குழந்தைகளுக்கு கல்வி போதிக்கப்படுகிறது. ஏழைக்கு ஒரு கல்வி, பணக்காரர்களுக்கு ஒரு கல்வி என்ற நிலை இன்னும் உள்ளது. இதனால் சமச்சீர் கல்வி வேண்டும்.

தமிழகத்தில் அரசு மருத்துவமனைகளில் 50 சதவீத டாக்டர்கள் பற்றாக்குறை இருப்பதாக மருத்துவ அதிகாரி ஒருவர் சொல்கிறார். ஆளுங்கட்சி நினைத்தால் நிரப்ப முடியாதா?

மக்கள் மீது அரசியல்வாதிகளுக்கு பயம் இருக்க வேண்டும். அப்படி பயம் வர வேண்டும் என்றால் ஓட்டு எனும் சவுக்கை கையில் எடுத்து வீச வேண்டும்.

ராமேஸ்வரம் மீனவர்கள் தாக்கப்படுகிறார்கள். மீன் பிடிக்க செல்லும் மீனவருக்கு கடலில் எல்லை தெரியுமா? அவர்கள் மீது மத்திய அரசுக்கு அக்கறை இருந்தால் அவர்கள் தாக்கப்படுவார்களா?

இன்னும் 2 நாளில் இலங்கையில் மொத்த தமிழர்களையும் கொன்று குவித்து விடுவார்கள்.

தன்னோடு கூட்டணி வைத்துள்ள மாநில அரசு கூறுவதை மத்திய அரசு ஏற்கவில்லை. பிறகு ஏன் கூட்டணி வைத்திருக்கிறீர்கள்.

திமுகவும், அதிமுகவும் ஊழல் செய்வதில் யார் பெரியவர் என்ற போட்டியில் இறங்கியுள்ளன. தேமுதிகவின் தேர்தல் பிரசாரத்தையும், எனக்கு கூடும் மக்கள் கூட்டத்தையும் பார்த்து திமுகவும், அதிமுகவும் பயந்து போய்க் கிடக்கின்றன, அதிர்ச்சி அடைந்து போயுள்ளன என்றார் விஜயகாந்த்.