மனைவிக்கு 101 வேல் வேலை தங்கைக்கு 60 தொகுதி பணி

ஸ்டாலின் முதல்வராக வேண்டும் என்று, அவரது மனைவி துர்கா,
கோவில் கோவிலாக சுற்றி வருகிறார். வீட்டிலும் சதா பூஜை,
ஹோமம் என, 'பிசி'யாக இருக்கிறார்.
-

-
'தமிழகத்தின், 101 முருகன் ஸ்தலங்களில் வேல் தானம் செய்தால், விரும்பியது நடக்கும்' என, ஜோஷியர் சொன்னாராம். ஸ்டாலின் கொளத்துாரில் வேட்பு மனு தாக்கல் செய்த அடுத்த நாளே வேலுடன் முருகன் ஸ்தலங்களுக்கு புறப்பட்டு விட்டார் துர்கா. சிக்கல் சிங்காரவேலர்கோவிலுக்கு வேல் தானம் கொடுத்து, முறையான ரசீதையும் பெற்றுக் கொண்டார்.

'வெற்றிவேல் முருகனுக்கு அரோகரா; சிக்கல் சிங்காரவேலனுக்கு அரோகரா' என்று சொல்லி, மெய்யுருகி வேண்டி, கோவிலில் பிராதும் கட்டியிருக்கிறார். அனைத்து கோவில்களுக்கும் அவரே சென்றால், அதற்குள் தேர்தல் முடிந்து விடும் என நிர்வாகி யாரோ, 'காலண்டரை' காட்டினாராம்.

எனவே, பல கோவில்களில் வேல் தானம் கொடுத்து பூஜை செய்து, அன்னதானமும் செய்தபின் பிரசாதம் மற்றும் ரசீதை, ஆழ்வார்பேட்டை வீட்டுக்கு அனுப்பி வைக்க சொல்லியிருக்கிறார். அதை அடுத்து, தமிழகத்தின் முருகன் கோவில்கள் அனைத்திலும், தி.மு.க.,வினர் பக்திப் பரவசத்துடன், 'வெற்றிவேல் முருகனுக்கு அரோகரா!' கோஷம் எழுப்பி வருகின்றனர்.

சமீப காலமாக, கோவில்களில், தி.மு.க., கரை போட்ட வேட்டிகள் அதிகம் தென்படுவதை பொதுமக்களும் பார்த்து வருவதால், அதை பெரிதாக கண்டுகொள்ளவில்லை. மனைவிக்கு ஆன்மிக, 'அசைன்மென்ட்' என்றால், தங்கைக்கு அரசியல், 'அசைன்மென்ட்' கொடுத்திருக்கிறார் தளபதி. 'தென் மாவட்டங்களில் உள்ள, 60 தொகுதிகளில் குறைந்தது, 50 தொகுதிகளை வென்று கொடுக்க வேண்டும்' என்று கனிமொழியிடம் சொல்லி இருக்கிறாராம்.

லோக்சபா தேர்தலுக்கு பின், அண்ணன் - தங்கை இடையே நிலவிய மனத்தாங்கல் மறைந்து விட்டதாம். எந்த விஷயமானாலும், ஸ்டாலினிடம், ஒரு வார்த்தை சொல்லி விட்டுச்செய்வதை கனிமொழி வாடிக்கையாக்கிய பின், இந்தப் புரிதல் ஏற்பட்டுள்ளது. உடனடியாக, அண்ணன் அழகிரியிடம் பேசி, தேர்தல் நேர கலாட்டாக்கள் எதுவும் வேண்டாம் என வேண்டிக் கொண்டிருக்கிறார்.

துாத்துக்குடி சென்று பாதிரியார்களை சந்தித்து பேசியிருக்கிறார். அடுத்து வரிசையாக, நாடார், பட்டியல் இனங்கள், முக்குலத்தோர் அமைப்புகள், பிள்ளைமார், நாயுடு, யாதவ சமுதாய தலைவர்களை சந்தித்து ஆதரவாக செயல்பட கேட்க இருக்கிறார்.

குடும்பமே சுறுசுறுப்பாக இயங்குகிறது. ஒரு மாதம் கடும் உழைப்புக்கு பின் ஓய்வுக்கு பஞ்சம் இருக்காது தானே.

தினமலர்