எஸ்.எஸ்.வாசன், தமது ஸ்டூடியோவுக்கு "ஜெமினி" என்ற பெயரை வைத்தது பற்றி...

எஸ்.எஸ்.வாசன், தமது ஸ்டூடியோவுக்கு "ஜெமினி" என்ற பெயரை
வைத்தது பற்றி அக்காலத்தில் ஒரு வதந்தி உண்டு.
வாசன் குதிரைப்பந்தயம் போவது வழக்கம் என்றும், ஜெமினி என்ற
குதிரை மீது பணம் கட்டியதில் நிறைய பணம் வந்தது என்றும்,
அந்தப் பணத்தைக்கொண்டு ஸ்டூடியோ அமைத்ததால் "ஜெமினி"
என்ற பெயர் சூட்டப்பட்டது என்றும் கூறுவார்கள்.

வாசன், குதிரைப் பந்தயத்துக்கு போவது உண்டு.
ஆனால், "ஜெமினி" என்ற பெயர் சூட்டப்பட்டதற்கு அது காரணம் அல்ல.
அவருடைய மனைவி பட்டம்மாளுக்கு மிதுன ராசி. மிதுனத்துக்கு
ஆங்கிலப் பெயர் ஜெமினி. எனவே தான், தன் ஸ்டூடியோவுக்கு
"ஜெமினி" என்று பெயர் சூட்டினார்.

குதிரைப் பந்தயத்தில் வாசனுக்கு ஏற்பட்ட அனுபவங்கள்
அபூர்வமானவை. குதிரைப் பந்தய நாளன்று அதிகாலையில்,
பந்தய மைதானத்தில் குதிரைகளை ஜாக்கிகள் ஓட்டிப் பார்த்து
பயிற்சி அளிப்பார்கள். இந்த பயிற்சியை வாசன் போய்ப்
பார்ப்பார். எந்தக் குதிரை நன்றாக ஓடுகிறது, எந்தக் குதிரை
வெற்றி பெறும் என்பதை துல்லியமாக கணித்து, அந்தக் குதிரை
மீது பணம் கட்டுவார்; வெற்றி பெறுவார்.

ஒரு சமயம் அவர் பம்பாயில் நடந்த குதிரைப் பந்தயத்துக்குச்
சென்றார். "ஸ்கூல் பார் ஸ்காண்டல்" என்ற குதிரை வெற்றி பெறும்
என்று உறுதியாக நினைத்தார். அந்தக் குதிரை மீது பணத்தைக்
கட்டினார்.

ஆனால், அந்தக் குதிரை தோற்றுவிட்டது.
பெருந்தொகையை இழந்தார், வாசன். "தொலைந்தார், அவர். இனி
குதிரைப்பந்தய மைதானத்தின் பக்கம் வரவேமாட்டார்" என்று பலரும்
பேசினார்கள்.

தோற்ற குதிரையை வாங்கினார்

ஜெயிக்கும் என்று நினைத்த குதிரை தோற்றது ஏன் என்று
யோசித்தார், வாசன். சில சமயம், குதிரைப் பந்தயத்தில்
தில்லு முல்லுகள் நடப்பது உண்டு. இந்த ஊழலுக்குத் துணை
போகும் ஜாக்கிகள், வெற்றிக் கம்பத்தை நெருங்கும்போது
குதிரையைப் பிடித்து இழுத்துவிடுவார்கள்.

தான் பணம் கட்டிய குதிரை, உண்மையில் வெற்றி பெறக்கூடிய
நல்ல குதிரைதான் என்பதை நிரூபிக்க வாசன் விரும்பினார்.
குதிரையின் சொந்தக்காரரைச் சந்தித்து, அந்தக் குதிரையை
விலைக்குத் தரும்படி கேட்டார்.

"உங்களுக்கு பெரிய நஷ்டம் ஏற்படுத்திய அந்தக் குதிரையையா
வாங்க நினைக்கிறீர்கள்? உண்மையாகவா?" என்று சிரித்தார்,
குதிரையின் சொந்தக்காரர்.

"உண்மையிலேயே அந்தக் குதிரைதான் எனக்கு வேண்டும்" என்றார்,
வாசன். குதிரையின் சொந்தக்காரர் சொன்ன விலையை கொடுத்து
குதிரையை வாங்கிக்கொண்டு, புனாவுக்குச் சென்றார்.

அங்கு குதிரைக்கும், குதிரை மீது சவாரி செய்பவருக்கும் சிறந்த
பயிற்சிகள் அளித்தார்.

பிறகு பம்பாயில் நடந்த குதிரைப் பந்தயத்தில், அந்தக் குதிரையை
கலந்து கொள்ளச் செய்தார். அதன் மீது நிறைய பணத்தைக்
கட்டினார். "தோற்ற குதிரையை வாங்கி ஓடவிடுவதுடன், அதன் மீது
நிறைய பணமும் கட்டியிருக்கிறார், வாசன்" என்று பலரும் கேலி
செய்தார்கள்.

ஆனால், அந்தப் பந்தயத்தில் வாசன் குதிரைதான் முதலாவதாக
வந்தது. அவருக்கு நிறைய பணம் கிடைத்தது. எல்லோரும்
அதிசயப்பட்டார்கள். இதன்பிறகு, படத்தயாரிப்பில் தீவிரமாக
இறங்கிவிடவே, குதிரைப் பந்தயத்துக்கு போவதை அடியோடு
நிறுத்திவிட்டார், வாசன்.
--------------
by ethirparathathu