உசிலம்பட்டி, கோவில்பட்டியில் சசிகலா வேட்பு மனு தாக்கல்?

-
மதுரை மாவட்டம் உசிலம்பட்டி, தூத்துக்குடி மாவட்டம் கோவில்பட்டி
ஆகிய, 2 தொகுதிகளில் வேட்பு மனு தாக்கல் செய்ய, சசிகலா தயார்
ஆகிறார் என, அ.ம.மு.க., வட்டாரத்தில் தீயாய் பரவுகிறது தகவல்.

சொத்துக் குவிப்பு வழக்கில், நான்கு ஆண்டுகள் சிறை தண்டனை
அனுபவித்தவர் சசிகலா.

அதனால், இன்னும் ஆறு ஆண்டுகளுக்கு, அவர் தேர்தலில் நிற்க
முடியாது என்கிறது, மக்கள் பிரதிநிதித்துவ சட்டம்.அந்த சட்டம்
தன்னை தடுக்கிறதா என்பதை களத்தில் சோதித்து பார்க்க
சின்னம்மா தீர்மானித்து விட்டார் என்கின்றனர், தினகரனின் ஆட்கள்.

மனுக்கள் தள்ளுபடி செய்யப்பட்டால், மாநில, மத்திய அரசுகள்
ஒரு தியாக தலைவியை தடுத்து விட்டதாக பிரசாரம் செய்யலாம்.
ஏற்கப்பட்டால், இரண்டில் ஒன்று பார்க்கலாம் என்று திட்டமாம்.

உசிலம்பட்டி, கோவில்பட்டி தொகுதிகளை தேர்வு செய்ய காரணம்,
அங்கு முக்குலத்தோர் ஓட்டுகள் கணிசமாக இருப்பதுதான்.
அவர்கள் தனக்கு ஆதரவு தர தயக்க மாட்டார்கள் என, சசி நம்புகிறார்.

செய்தித் துறை அமைச்சர் ராஜு, இரண்டு முறை தொடர்ச்சியாக
வெற்றி பெற்ற தொகுதி கோவில்பட்டி. உசிலம்பட்டியில், அ.தி.மு.க.,வின்
நீதிபதி (பெயரே அதுதான்) எம்.எல்.ஏ.,வாக இருக்கிறார்.

இன்னொரு பக்கம், சசிகலாவின் சுற்றுப்பயணத்துக்கான ஏற்பாடுகளும்
ஜரூராக நடக்கிறது. 'வெற்றி நடை போடப்போகும் சின்னம்மா' என்ற
பேனர் ஏந்தி பயணம் போக இருக்கிறாராம்.

வரும், 24ம்தேதி, ஜெயலலிதாவின், 73 வது பிறந்தநாள்.
மெரினா கடற்ரையில் இப்போது மூடி வைக்கப்பட்டுள்ள அவரது
நினைவிடம், அன்று திறந்து விடப்படும். அங்கு அஞ்சலி செலுத்தி விட்டு
சென்னையில் இருந்து கிளம்புகிறார், சசிகலா. மறுநாள் பொதுக்கூட்டம்
காஞ்சிபுரமா மதுரையா என்பது முடிவாகவில்லை.'தி.மு.க. என்ற
தீயசக்தியின் கையில் மீண்டும் தமிழகம் போய்விட கூடாது' என்பது,
அவரது பிரசாரத்தின் மையம கருத்தாக இருக்குமாம்.

தினமலர்