திருட்டு விசிடி சட்டம் கடுமையாக்கினார் முதல்வர்

by rikniz Wed Jan 13, 2010 8:54 pm

பெரிய நடிகர்களின் படங்கள் வரும் போது மட்டும் திரையுலகத்தில் “ஐயோ ஐயய்யோ...” குரல் கேட்கும்படி செய்வார்கள் திருட்டு விசிடி காரர்கள். சிறு படங்களுக்கும் ஓடாத படங்களுக்கும் அவர்களே விசிடி போடுவதில்லை என்பது தொழில் ரகசியம். ஒவ்வொரு முறையும் தங்கள் படத்தை பறி கொடுக்கும் போது அலறும் சில ஹீரோக்கள், அடுத்தவர் படங்களுக்கு பிரச்சனை வரும்போது கண்டு கொள்வதே இல்லை. ஆனால் எல்லாவற்றையும் தலைகீழாக மாற்றிப் போட்டிருக்கிறது ஜக்குபாய் பிரச்சனை.

ரஜினி, கமல், சரத்குமார், பிரபு என்று நட்சத்திர முக்கியஸ்தர்களும், தயாரிப்பாளர் சங்க தலைவர் இராம.நாராயணன் உள்ளிட்ட பல்வேறு அமைப்பே சேர்ந்த பிரமுகர்களும் முதல்வர் கலைஞரை சந்தித்து தங்கள் குறைகளை கொட்டி தீர்த்தார்கள். உங்கள் காலத்தில் இதற்கு தீர்வு அமையாவிட்டால் எக்காலத்திலும் இதற்கு விடிவு இல்லை என்று அவர்கள் வேதனைப்பட, சட்டத்தை கடுமையாக்க உத்தரவிட்டிருக்கிறார் முதல்வர்.

தற்போது எடுக்கப்பட்டுள்ள முடிவுகள் என்ன?

திரைப்படங்களில் ஒளி நாடா மற்றும் சிடிக்களை திருட்டுத்தனமாக விற்பவர், வைத்திருப்பவர், மற்றும் தயாரிப்பாளர் மீது குண்டர் சட்டத்தின் கீழ் தீவிர நடவடிக்கை எடுக்கப்படும்.

இந்த சட்டத்தின்படி குறைந்தபட்சம் ஆறு மாத சிறை தண்டனை கிடைக்க அரசின் சார்பில் உறுதியான நடவடிக்கை எடுக்கப்படும்.

இந்த சட்டப்பிரிவுகளை மேலும் தீவிரமாக்க மத்திய அரசுக்கு தமிழக அரசு பரிந்துரை அனுப்பும்.

அரசு சார்பில் இந்த நடவடிக்கைகள் எடுக்கப்படும் நிலையில் திரைப்பட துறையை சார்ந்தவர்கள் மூலம் இந்த திருட்டு விசிடிக்கள் பரவாமல் தடுக்க அவர்களின் பல பிரிவுகளின் கீழ் முன்னெச்சரிக்கை நடவடிக்கை எடுத்துக் கொள்ள அறிவுறுத்தப்படுகின்றனர்.

ஜக்குபாய் திருட்டு விசிடி வெளியிட்டவர்கள் மீது நடவடிக்கை எடுக்க உத்தரவிட்டதற்கும், திரைப்பட துறையினருக்கு வீடு கட்டிக் கொள்ள நிலம் ஒதுக்கியதற்கும் முதல்வர் கருணாநிதிக்கு திரைப்பட துறையினர் நன்றி தெரிவித்தனர்.