`என் மனைவிக்கு கணவனாகவும் தந்தையாகவும் இருப்பேன்!' - கனவுகளோடு சின்னக்கருப்பு

-
சிவகங்கை மாவட்டம் ஒக்கூர் கிராமத்தைச் சேர்ந்த இளைஞர்
சின்னக்கருப்பு. 24 வயதான இவரின் உயரம், மூன்று அடி.
இந்நிலையில் இவரைப்போல் உயரம் குறைந்த பஞ்சு என்ற
பெண்ணை காதல் திருமணம் செய்துகொண்டுள்ளார்
சின்னக்கருப்பு. இந்தப் புதுமண தம்பதிக்குப் பலரும் வாழ்த்து
தெரிவித்து வருகின்றனர்.
-

கல்யாண மாப்பிள்ளை சின்னக்கருப்பு,
"அப்பா, அம்மா ரெண்டு பேரும் சொந்தத்துல கல்யாணம்
முடிச்சுக்கிட்டதால எனக்கு முன்னாடி பொறந்த ரெண்டு
குழந்தைங்களும் இறந்துட்டதா சொல்லுவாங்க.
நானும் அதனாலதான் குட்டையா பிறந்தேன்னு சொல்லுவாங்க.
எனக்குப் பிறந்ததுல இருந்து கஷ்டம் பழகிட்டதால வேற
ஒண்ணும் பெருசா தெரியல.

நமக்குக் கல்யாணம்னு ஒண்ணுயெல்லாம் நடக்காதுனுதான்
நினைச்சுக்கிட்டு இருந்தேன்.

அப்போதான் என் மனைவி பஞ்சை பார்த்தேன். என்ன
கல்யாணம் செஞ்சுகிறியானு கேட்க பயமா இருந்துச்சு.
இருந்தாலும் மனசுல தைரியத்த ஏற்படுத்திக்கிட்டு,
அவங்ககிட்டயும், அவங்க வீட்டுலயும் சம்மதம் வாங்கி
திருமணம் செஞ்சுக்கிட்டேன்.

கல்யாண மறுவீடும் போய்ட்டு வந்துட்டேன். நடந்தது எல்லாம்
ஒரு கனவு மாதிரி இருக்கு. என் மனைவிக்கு சின்ன வயசுல
இருந்து அப்பா இல்ல. அதனால அவளுக்கு ஒரு நல்ல
அப்பாவாவும் கணவனாவும் இருக்கணும்னு ஆசைப்படுறேன்''
என்றார் நேசத்துடன்.

மணப்பெண் பஞ்சு, "எனக்குக் கல்யாணம் ஆகும்னு நானும்
நினைச்சுகூடப் பார்க்கல. ஆனா, இப்ப ஒரு குடும்பத்
தலைவியா இங்க நிக்குறேன். எனக்கு எம்பிராய்டரிங் தெரியும்.
அதுக்கான வாய்ப்புதான் இந்தப் பக்கம் கிடைக்குதானு
தெரியல.

எனக்கு இல்லாட்டியும் என் கணவருக்கு ஏதாவது ஒரு அரசு
உத்தியோகம் கிடைச்சா போதும். எங்க வாழ்க்கையில முழுசா
ஒளி ஏற்பட்டதா நினைப்போம்" என்றார் வேண்டுகோளாக.

அன்பு வளரட்டும்!
--
-அருண் சின்னதுரை
நன்றி-விகடன் (கட்டுரையின் ஒரு பகுதி)

வாழ்த்துகள் .
கூடிய விரைவில் அரசு வேலை கிடைக்க வாழ்த்துகள்.