20 ஆண்டுகளுக்கு பிறகு முல்லை பெரியாறு அணைக்கு மின்சாரம்!: கேரள மின்துறை அமைச்சர் தொடங்கி வைத்தார்..!!

-
திருவனந்தபுரம்:
முல்லை பெரியாறு அணைக்கு 20 ஆண்டுகளுக்கு பிறகு கேரள அரசு
மின் இணைப்பை தொடங்கியிருக்கிறது. 1980 முதல் வல்லக்கடவு
வனப்பகுதி வழியாக உயரழுத்த மின் கோபுரம் மூலம் முல்லை
பெரியாறு அணைக்கு மின்சாரம் விநியோகிக்கப்பட்டு வந்தது.

2000 ஆண்டில் உயரழுத்த மின்கம்பி உரசி காட்டு யானை
உயிரிழந்துவிட்டதை அடுத்து மின் விநியோகம் நிறுத்தப்பட்டது.
சோலார் மின்விளக்கு மற்றும் ஒளி குறைவான ஜெனரேட்டர்களே
அணை பகுதியில் பயன்படுத்தப்பட்டு வந்தன.

இதனால் வன விலங்குகளுக்கு இடையூறு ஏற்படாத வகையில் தரை
வழியாக மின்கம்பிகளை பதிக்க தமிழக அரசு நிதி உதவி அளித்தது.
19 ஆண்டுகளாக கிடப்பில் இருந்த இந்த திட்டம், தற்போது
நிறைவேற்றப்பட்டு மின் இணைப்பு வழங்கப்பட்டு உள்ளது.

கேரள மாநிலம் வண்டிப்பெரியாரில் உள்ள தனியார் பள்ளியில்,
தீர்மேடு எம்.எல்.ஏ. டிஜிமோல் தலைமையில் நடந்த நிகழ்ச்சியில் கேரள
மின்துறை அமைச்சர் எம்.எம். மணி முல்லை பெரியாறு அணைக்கு
மின் இணைப்பை தொடங்கி வைத்தார்.

இதுகுறித்து செய்தியாளர்களிடம் பேசிய அவர், இத்திட்டத்திற்காக
தமிழக அரசு நிதி கொடுத்தது. காங்கிரஸ் ஆட்சியில் இத்திட்டம்
கிடப்பில் போடப்பட்டுவிட்டது.

இப்போது எங்கள் ஆட்சியில் ( கம்யூனிஸ்ட் ) திட்டம் செயல்படுத்தப்பட்டு
இருக்கிறது. கேரளா முழுமைக்கும் மின்சாரம் விநியோகிக்கும் போது,
முல்லை பெரியாறு அணை பகுதிக்கு மட்டும் கொடுக்காமல் இருந்தால்
எப்படி?

காலதாமதமாக வழங்கப்பட்டாலும் மின்சாரம் வழங்கியதில் மகிழ்ச்சி.

இரு மாநிலங்களுக்கு இடையே சுமூக உறவு ஏற்பட்டுள்ளது என தெரிவித்தார்.
இந்நிகழ்ச்சியில் தமிழக பொதுப்பணித்துறை சார்பில் மதுரை பெரியார்
வைகை வடிநில கோட்ட கண்காணிப்பு பொறியாளர் சுகுமாரன் கலந்து
கொண்டார். தரை வழி மின்கம்பி திட்டத்திற்காக கேரள மின்வாரியத்திற்கு
தமிழக பொதுப்பணித்துறை 1 கோடியே 66 லட்சம் ரூபாய் நிதி வழங்கியிருக்கிறது.

வல்லக்கடவு வனப்பகுதியில் 5.65 லட்சம் கிலோ மீட்டர் தொலைவு
அமைக்கப்பட்டுள்ள தரைவழி மின்கம்பிகள் மூலம் காட்டு உயிர்களுக்கு
எந்த பாதிப்பும் நேரிடாது என்பது குறிப்பிடத்தக்கது.

தினகரன்