கடும் மன உளைச்சல் - பிரசாத் ஸ்டூடியோ வருகையை ரத்து செய்தார் இளையராஜா

**ayyasamy ram** · **ayyasamy ram** Mon Dec 28, 2020 3:07 pm

சென்னை சாலிகிராமத்தில் அமைந்துள்ள பிரசாத் ஸ்டூடியோவில்
ஓர் அரங்கை இசையமைப்பாளர் இளையராஜா 35 ஆண்டுகளுக்கு
மேலாக ‘ரெக்கார்டிங் தியேட்டராக’ பயன்படுத்தி வந்தார்.

இந்தநிலையில் அந்த அரங்கை வேறு தேவைக்குப் பயன்படுத்த
பிரசாத் ஸ்டூடியோ நிர்வாகம் முடிவு செய்தது.

அதனால் இளையராஜாவுக்கும் பிரசாத் ஸ்டூடியோ
நிர்வாகத்தினருக்கும் இடையே கருத்து வேறுபாடு ஏற்பட்டது.
இளையராஜாவை அந்த இடத்திலிருந்து ஸ்டூடியோ நிர்வாகம்
வெளியேற்றியது.

இதுகுறித்து சென்னை கோர்ட்டிலும், போலீசிலும் இளையராஜா
புகார் செய்தார்.

இதையடுத்து பிரசாத் ஸ்டூடியோவில் தான் வைத்திருந்த
பொருள்களையும், இசைக்குறிப்புகளையும் எடுத்துக்கொள்ள
அனுமதி கோரி சென்னை ஐகோர்ட்டில் இளையராஜா வழக்குத்
தொடர்ந்தார்.

இந்த வழக்கை விசாரித்த நீதிபதி என்.சதீஷ்குமார்,
இரு தரப்பினரையும் சமரசமாகச் செல்லும்படி அறிவுறுத்தினார்.
அதற்கு இரு தரப்பினரும் உடன்பட்டனர்.

அதைத் தொடர்ந்து இளையராஜாவை இன்று காலை 9 மணி முதல்
மாலை 4 மணி வரை பிரசாத் ஸ்டூடியோவுக்குள் அனுமதிப்பது
என்று முடிவு செய்தனர்.

இந்தநிலையில், இன்று காலை பிரசாத் ஸ்டுடியோவுக்கு வருகை
தந்த இளையராஜாவின் வக்கீல், ஸ்டூடியோவில் உள்ள பொருட்கள்
குறித்த நிலவரத்தை இளையராஜாவிற்கு தெரியப்படுத்தினார்.

அதைக்கேட்டு மனமுடைந்த இளையராஜா, தனது வருகையை
ரத்து செய்வதாக அறிவித்துள்ளார். பிரசாத் ஸ்டூடியோவில் தான்
பொக்கிஷமாக பாதுகாத்து வந்த சில பொருட்கள் காணாமல்
போயுள்ளதால் இளையராஜா வருத்தமடைந்ததாக
கூறப்படுகிறது.

இதுகுறித்து இளையராஜா வக்கீல் தியாகராஜன் கூறுகையில்,
‘பிரசாத் ஸ்டூடியோவில் உள்ள இளையராஜாவின் தனி அறை
கதவுகள் உடைக்கப்பட்டு உள்ளன.

அவரின் பொருட்கள் வேறு இடத்திற்கு மாற்றப்பட்டுள்ளது.
இதனால் இளையராஜா மிகவும் வருத்ததில் உள்ளார்’ என்று
தெரிவித்தார்.

மாலைமலர்

Guest · Guest Mon Dec 28, 2020 3:41 pm

பிரச்சனை எதுவும் சரியாக தெரியாமல் கருத்து சொல்லக் கூடாது.

**T.N.Balasubramanian** · **T.N.Balasubramanian** Mon Dec 28, 2020 4:38 pm

நான் அறிந்த வகையில் திரு LV பிரசாத் அவர்கள்
அந்த காலத்து வளரும் இசைஞானியை ஊக்குவிக்க
தன்னுடைய ஸ்டுடியோவில் ஒரு ஷெட்டை இலவசமாக
உபயோகிக்க அனுமதித்ததாக கேள்வி.
பிரசாத் காலத்திற்கு பின் அவருடைய மகன் ஆளுகையில்
வந்த பிரசாத் ஸ்டுடியோ , வாடகை வசூலிக்க அணுகியபோது
வளர்ந்து செழுமையாக உள்ள இளையராஜா இப்போதும்
இலவசமாக உபயோகிக்க வேண்டுகோள் விட்டாராம்.
இதற்கு மேல் என்னென்ன நடந்திருக்கும் என்பதை
படிக்கும் அன்பர்களின் கற்பனைக்கு விட்டுவிடுகிறேன்.

Guest · Guest Wed Dec 30, 2020 1:05 pm

ஒரு தொலைக்காட்சி வாடகைப் பிரச்சனை என்கிறது,இன்னொரு தொலைக்காட்சி இல்லையில்லை வாடகைப் பிரச்சனை அல்ல..என விளக்கம் கொடுக்கிறது.
எதுவாயினும் இசைமேதை என புகழப்படுபவர் பக்கம் என்னவோ உதைக்கிறதே!
இன்று லாரிகளில் அவர் பொருட்கள் ஏற்ற்ப்படுகின்றன. கோயிலாக பார்த்த இடம் என்றால்-இவ்வளவு புகழையும் பணத்தையும் சேர்த்த அவர் தனக்கு சொந்தமான இடத்தில் அல்லது ஜுவன் சங்கர் ராஜாவின் மிகப் பெரிய வசதிகள் கொண்ட ஸ்ரூடியோவில் வைக்கலாமே!

எஸ்.பிபி மேல் பணத்துக்காக சண்டை போட்டு பிரிந்தவர்..இப்படி பல..

எதுவும் புரியல. பொது வாழ்வுக்கு வந்து விட்டால் தெரிந்து கொள்வதில் தவறில்லை?

**ayyasamy ram** · **ayyasamy ram** Wed Dec 30, 2020 1:21 pm

படத்திற்கு இசையமைக்க ஊதியம் பெற்ற பின்னர்
தான் இசையமைத்த பாடல்களை பிறர் மேடையில்
பாடி சம்பாதிப்பதை பொறுக்க முடியாதவர் ...!
-
எஸ்.பிபி மேல் பணத்துக்காக சண்டை போட்டு பிரிந்த
போதே இவர் மீது ரசிகர்கள் பெரும் மன உளைச்சலுக்கு
ஆனார்கள்!!
-
இரண்டு ஆண்டுகளாக பிரசாத் ஸ்டூடியோவில் இவர்
உபயோகத்தில் இருந்த அறைகளை காலி பண்ணச்
சொல்லி விட்டார்கள்!
-
இவர் ரூம்களை பூட்டு போட்டு பூட்டி விட்டு வந்து
விட்டார்!
-
இரு சாராருக்கும் கருத்து வேற்றுமை ஏற்பட்டு
கோர்ட்டு வாசற்படி ஏறி விட்டார்கள்!
-
திரையுலகில் நடுநிலையாளர்களை அணுகி
பிரச்சனையை தீர்த்துக் கொண்டிருக்க வேண்டும்!!
-

**T.N.Balasubramanian** · **T.N.Balasubramanian** Wed Dec 30, 2020 5:06 pm

பதவி வரும்போது, புகழ் சேரும்போது
தான்தான் உயர்ந்தவன் என்றும் தன்னை யாரும் கேள்வி கேட்கக்கூடாது தான் சொன்னதை மற்றவர்கள் கேட்கவேண்டுமென நினைப்பது அரசியலில்தான்
இப்போது கலை உலகமும் அதற்கு அடிமையாகிவிட்டது.