மங்களம் மலரந்திடும் மகாலட்சுமி தரிசனம்

திருமகளின் திரு அவதாரம் நிகழ்ந்த முக்கிய தினமான
தீபாவளியன்று மகாலட்சுமியை வழிபடுவது என்பது
மரபாக வரும் விஷயம்.

நரகாசுரன் வதம் செய்யப்பட்ட சம்பவத்தைவிட
முக்கியத்துவம் வாய்ந்த, உலகெங்கும் கங்கையையும்,
சகல செல்வங்களையும் பாயச் செய்த தினமே தீபாவளி
எனலாம்.

உலகத்தின் சகல செல்வங்களின் மொத்த உறைவிடமாக
இருப்பவளே மகாலட்சுமி. எனவேதான்,
மகாலட்சுமியின் அருள் பெற்றவரில் முதன்மையானவராக
யட்ச ராஜனான குபேரன் விளங்குகிறான். இவனிடமே
நவநிதிகளும் குவிந்துள்ளன.
-

-
அவற்றில் சங்கநிதியும், பதும நிதியும் முக்கியமானவை.
ஆலய வாயில்களில் சங்க நிதி, பதும நிதியை யட்ச வடிவில்
தரிசிக்கலாம். எனவே, தீபாவளித் திருநாளில்
மகாலட்சுமியோடு குபேரனையும் சேர்த்து பூஜிக்கிறோம்.

இவ்வுலக வாழ்வு செம்மையாக இருக்கவும், அவ்வுலக
வாழ்விற்கு நம்மைத் தயார்படுத்தவும் மகாலட்சுமியின்
அருள் முக்கியம். செல்வத்தின் அதிபதியாக இருப்பவளே,
ஞான லட்சுமியாக ஞானியரின் இருதயத்திலும்
வீற்றிருக்கிறாள்.

தீபாவளித் திருநாளில் மகாலட்சுமி எனும் பெருந் தீபத்தை
நம் இருதயத்தில் ஏந்துவோம். தீபாவளியன்று நிறைய
தீபங்களை ஏற்றி வைத்து பூஜிக்க செல்வ வளம் பெருகும்
என்பதை, ‘‘நீராஜிதோ மஹாலக்ஷ்மீ மர்ச்சயன்
ச்ரியமச்சனுதே தீ பைர் நிராஜிதா யத்ர தீபாவளிரிதி
ஸ்ம்ருதா’’ எனும் வரிகள் கூறுகின்றன.

தீபாவளியன்று தலைக்குத் தேய்க்கும் எண்ணெயில்
மகாலட்சுமியும், குளிக்கும் வெந்நீரில் கங்கையும் வாசம்
செய்கிறாள் என்பதை,
‘‘தைலே லக்ஷ்மீர் ஜலே கங்கா தீபாவளிதினே வஸேத்’’
எனும் வரிகள் உறுதிப்படுத்துகின்றன.

எனவே, தீபாவளியன்று மகாலக்ஷ்மியை தியானித்து வணங்க
சித்தத்தில் தெளிவும், லௌகீக வாழ்வின் வளங்களும், ஞான
மார்க்கத்தில் இச்சையும் நிச்சயம் உண்டாகும்.
-
நன்றி- குங்குமம்