எதைச் செய்தாலும் முழு ஆசையோடு செய்யுங்கள்!

நீங்கள் மட்டும் சந்தோஷமாக இருந்தால் போதாது.
நீங்கள் இருக்கும் இடத்தில் உங்களால் மற்றவர்களுக்கும்
சந்தோஷம் இருக்க வேண்டும். சுற்றி இருப்பவர்கள்
உங்களைச் சந்தோஷத்தோடு ஏற்கவேண்டும்

காட்டில் ஒரு சிங்கம் கால்களை வீசி கர்வத்தோடு
நடந்தது. அந்தப் பக்கம் போய்க் கொண்டிருந்த
முயல் குட்டியை சட்டென்று பிடித்தது.

"ஏய், இந்தக் காட்டில் யார் ராஜா?" என்று கேட்டது.
முயல் குட்டி பற்களெல்லாம் கிடுகிடுக்க,
"சந்தேகமென்ன? நீங்கள்தான்" என்றது.

சிங்கம் முயலை விட்டுவிட்டு, அடுத்ததாக ஒரு
நரியைத் தாவி பிடித்தது. அதே கேள்வியைக் கேட்டது.

நரி நடுக்கத்துடன், "தலைவா... உனக்கேன் இந்த
சந்தேகம்? உன்னைத் தவிர, வேறு யார் இங்கே
ராஜாவாக இருக்க முடியும்?"

அப்புறம் வழியில் எதிர்ப்பட்ட மிருகங்கள் எல்லாம்
பணிவாக மண்டியிட்டு சிங்கத்திடம்,
"நீங்கள்தான் ராஜா" என்று அச்சத்தில் அலறின.

சிங்கத்துக்குப் பெருமை பிடிபடவில்லை.
இன்னும் கொஞ்சம் தூரம் போனது.

அங்கே ஒரு யானை, சிங்கத்தைப் பொருட்படுத்தாமல்
அதுபாட்டுக்கு மரத்தில் இருந்து இலைகளைப் பறித்துக்
கொண்டிருந்தது.

சிங்கம் அதன் எதிரில் போய் நின்று,
"ஏய் முட்டாளே, யார் இந்த காட்டுக்கு ராஜா?" என்று
கர்ஜித்தது.

யானை திரும்பியது. தும்பிக்கையால் சிங்கத்தைச்
சுருட்டித் தூக்கியது. ஓங்கித் தரையில் அடித்தது.

சிங்கத்தின் முதுகெலும்பே முறிந்து போயிற்று.
"ஏம்ப்பா, இப்ப நான் என்னப்பா கேட்டுப்புட்டேன்?
வாய் வார்த்தையாகச் சொல்லப்படாதா?" என்று வலியில்
முனகியபடி கேட்டது சிங்கம்.

"இனிமேல் இந்த விஷயத்தில் உனக்குக் குழப்பமே
வரக்கூடாது பார்!" என்றது, யானை.

சுற்றியிருப்பவர்கள் உங்களை மகிழ்ச்சியுடன்
ஏற்காவிட்டால், சிங்கத்திற்குக் கிடைத்த அனுபவம்தான்
உங்களுக்கும் கிடைக்கும்.

இப்படி வேறு யாராவது உங்களுக்குக் கற்பிப்பதற்கு
முன் உங்கள் வாழ்க்கையை நீங்களே இனிதாக
அமைத்துக்கொள்ளக் கற்றுக்கொள்ளுங்கள்.

எதைச் செய்தாலும் முழு ஆசையோடு செய்யுங்கள்!
-
-சத்குரு