அமைச்சர் பதிலில் திருப்தி இல்லை தமிழகத்தில் 27ம் தேதி முதல் திட்டமிட்டபடி லாரி ஸ்டிரைக்: சம்மேளன செயலாளர் அறிவிப்பு

**ayyasamy ram** · **ayyasamy ram** Fri Dec 11, 2020 7:20 am

நாமக்கல்:
திட்டமிட்டபடி தமிழகத்தில் வரும் 27ம் தேதி முதல் லாரி ஸ்டிரைக்
நடைபெறும் என லாரி உரிமையாளர்கள் சம்மேளன மாநில
செயலாளர் தெரிவித்தார்.

நாமக்கல்லில் மாநில லாரி உரிமையாளர்கள் சம்மேளன
செயலாளர் வாங்கிலி நேற்று அளித்த பேட்டி: தமிழகத்தில்
உள்ள ஆர்டிஓ அலுவலகங்களில், லாரி உள்ளிட்ட சரக்கு
வாகனங்களுக்கு தகுதிச்சான்று புதுப்பிக்க (எப்சி பெற)
குறிப்பிட்ட நிறுனங்களின் வேகக்கட்டுப்பாட்டு கருவி,
ஒளிரும் ஸ்டிக்கர், ஜிபிஎஸ் கருவி பொருத்த வேண்டும்
என போக்குவரத்து ஆணையர் உத்தரவிட்டுள்ளார்.

தரச்சான்று பெற்ற அனைத்து நிறுவனங்களின் தயாரிப்பு
கருவிகளை பொருத்த, நாங்கள் தயாராக இருக்கிறோம்.
ஆனால் குறிப்பிட்ட நிறுவனங்களிடம் இருந்துதான் வாங்க
வேண்டும் என அதிகாரிகள் கூறுவதால், கூடுதல் செலவு
ஏற்படுகிறது.

ஆனால் போக்குவரத்து துறை அமைச்சர் விஜயபாஸ்கர்,
தகுதிச்சான்று பெற, எந்த வகையிலும் லாரி
உரிமையாளர்களை நிர்பந்தம் செய்யவில்லை என்கிறார்.

அதிகாரிகள் என்ன உத்தரவு போடுகிறார்கள் என்பதே
தெரியாமல் அமைச்சர் பேசுகிறார். சரக்கு போக்குவரத்து
வாகனங்களுக்கு ஜிபிஎஸ் கருவி பொருத்த தேவையில்லை
என அமைச்சர் எங்களிடம் கூறுகிறார்.

ஆனால் மறுநாளே போக்குவரத்து ஆணையர், லாரி
உரிமையாளர்களுக்கு நெருக்கடி கொடுக்கும் விதமாக,
ஜிபிஎஸ் கருவி பொருத்தினால் தான் எப்சி பெறமுடியும்
என உத்தரவு போடுகிறார்.

எனவே, ஏற்கனவே அறிவித்தபடி வரும் 27ம் தேதி முதல்
தமிழகம் முழுவதும் லாரி ஸ்டிரைக் நடைபெறும். இதுவரை
மாநில அரசு எங்களை பேச்சுவார்த்தைக்கு அழைக்கவில்லை.

கொரோனா காலத்தில் மக்களுக்கு அத்தியாவசிய
பொருட்கள் தட்டுப்பாடு இன்றி கிடைக்க உயிருக்கு
பயப்படாமல் லாரிகளை வெளி மாநிலங்களுக்கு இயக்கினோம்.

ஆனால், போக்குவரத்து துறை அதிகாரிகள்,
புதிய விதிமுறைகளை போட்டு தொழில் செய்யவிடாமல்
எங்களை நசுக்குகிறார்கள் என்றார்.

தினகரன்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக