பெண்கள் முன்னேற்றமே என் மூச்சு!

-
சென்னையில் பிறந்து வளர்ந்து, அமெரிக்காவின் ஹார்வர்டு
பல்கலைக்கழகத்தில், எம்.பி.ஏ., படித்து, நடத்தை வியூகம்
எனப்படும், 'பிஹேவியரல் ஸ்ட்ராட்டஜி' என்ற புதிய பிரிவில்,
சிறந்த பெண்ணாக தேர்வு செய்யப்பட்டுள்ள சரண்யா கண்ணன்:

நல்ல குருநாதர்கள் கிடைத்ததால் தான், வாழ்க்கையில்
நான் இவ்வளவு துாரம் முன்னேறியுள்ளேன். இந்த வெற்றியை
மற்றவர்களுக்கு சொல்ல நினைக்கிறேன்.

அதற்காக எந்தெந்த வழிகளில் முடியுமோ அந்தந்த வழிகளில்,
பெண்கள் முன்னேற்றத்திற்காக பாடுபடுகிறேன். பிரிட்டன்
முன்னாள் பிரதமர் டோனி பிளேர் மனைவி செர்ரி பிளேர்
நடத்தும், பெண்கள் அமைப்பில், பெண்கள் நடத்தும்
வணிகங்களுக்கு, 'மென்டார்' எனப்படும், குருநாதர் போன்ற
பதவியில் இருந்து வழிநடத்தி வருகிறேன்.

இதற்காக, உலகம் முழுதும் பெண்கள் என்னைத் தொடர்பு
கொள்கின்றனர்.

சமீபத்தில் கூட, தென் அமெரிக்க நாடான அர்ஜென்டினாவிலிருந்து
ஒரு இளம்பெண் என்னை தொடர்பு கொண்டு, இ-காமர்ஸ் பற்றி
ஆலோசனை கேட்டார்.

அதுபோல, அமெரிக்காவின் ஹார்வர்டு பல்கலைக் கழகத்தின்
பெண்கள் ஆதரவு வட்டத்தில், பெண்கள் முன்னேற்றத்திற்கான
ஆலோசனைகளை வழங்கி வருகிறேன்.

இப்போதும் இந்தியாவிலிருந்து நிறைய பெண்கள் என்னை,
இ-மெயிலில் தொடர்பு கொண்டு, அமெரிக்காவில் படிப்பது,
முன்னேறுவது தொடர்பாக கேள்விகள் கேட்ட வண்ணம்
உள்ளனர்.

நானும் எனக்கு தெரிந்த தகவல்களை தெரிவித்து வருகிறேன்.
இதுமட்டுமின்றி, பெண்களுக்கான ஆலோசனைகளை, நண்பர்கள்
வட்டம், 'பேஸ்புக்' மூலமும் செய்கிறேன். இப்படி பெண்கள்
முன்னேற்றத்திற்காக பாடுபடுவதாலும், நிறைய புதிய
முயற்சிகளை தெரிவிப்பதாலும், 'ஸ்டீவி' என்ற விருது எனக்கு
வழங்கப்பட்டுள்ளது.

ஒவ்வொரு ஆண்டும் வழங்கப்படும் இந்த வணிக விருதுக்கு,
70 நாடுகளில் இருந்து, 12ஆயிரத்திற்கும் மேற்பட்டோர்
போட்டியிடுவர். அந்த விருது, எனக்கு கிடைத்தது.

வழக்கமாக, உலக அளவில் பெரிய நிறுவனங்களின் தலைவர்கள்,
தலைமை அதிகாரிகளுக்குத் தான், அந்த விருது வழங்கப்படும்.
ஆனால், எனக்கு கிடைத்தது. அது எனக்கு மிகவும் பெருமையாக
உள்ளது.

எனக்கு பிடித்த எந்த வேலையையும் ஆர்வமாக செய்வேன்.
அடிப்படையில் நான் ஒரு பரத நாட்டிய கலைஞர். புத்தகங்கள்,
பயணம் தான் எனக்கு பிடித்தமானவை.

சமையல் செய்ய பிடிக்காது. அதனால், 'நன்றாக படித்து முன்னேறி
விட்டால், சமையல் செய்ய தேவை இல்லை' என நினைத்து,
நன்றாக படித்து, உயர்ந்த நிலையை அடைந்துள்ளேன்.

நாங்கள் வசிக்கும் அமெரிக்காவில் சமைக்க ஆள் கிடைக்க
மாட்டார்கள் என்பதால், என் கணவர் தான் சமைக்கிறார்.
நான் நன்றாக ருசித்து சாப்பிடுகிறேன்.
எங்களுக்கு, 6 வயதில் மகன் உள்ளான்!
-
------------------------
தினமலர்