3 ஆண்டுகள் வரை பயன்படுத்தக்கூடிய மூங்கிலால் ஆன டிபன் பாக்ஸ்: இளைஞரின் கைவண்ணம்!

-
மணிப்பூரை சேர்ந்த இளைஞர் ஒருவர் மூன்று ஆண்டுகள்
வரை பயன்படுத்தக் கூடிய மூங்கிலால் ஆன டிபன் பாக்ஸ்
ஒன்றை வடிவமைத்துள்ளார்.

27 வயது இளைஞர் ஜின்கான்பாவுக்கு சிறுவயது முதலே
இயற்கை என்றால் கொள்ளை பிரியம். காடுகளுக்குள் சென்று
மூங்கில், பழங்கள் உள்ளிட்டவைகளை சேகரிப்பது அவரது
வழக்கம். அதிலும் மூங்கிலின் முக்கியத்துவத்தை அதிகம்
உணர்ந்த அவர் அதனை பயன்படுத்தி ஏதாவது வித்தியாசமாக
செய்ய வேண்டும் என நினைத்துள்ளார்.

வீட்டில் நாம் தினமும் பயன்படுத்தும் பொருட்கள், வேலி உள்ளிட்ட
அனைத்தையும் மூங்கில் வைத்து தயாரிக்க முடியும் என்ற
யோசனை அவருக்கு வந்துள்ளது.

தொடக்கத்தில் மூங்கில் வைத்து, வயதானவர்கள் நடப்பதற்கு
உதவும் கைப்பிடிகளை வடிவமைத்துள்ளார். பள்ளிப்படிப்பை
முடித்த பிறகு அதனையே தனது முழுநேர வேலையாக
மாற்றியுள்ளார்.

மூங்கில் வைத்து பேனா, தண்ணீர் பாட்டில் என தனது
கைவண்ணத்தை காண்பிக்க ஆரம்பித்துள்ளார். தற்போது அந்த
வரிசையில் டிபன் பாக்ஸும் இணைந்துள்ளது.

இதன் சிறப்பம்சம் என்னவென்றால் இதனை நீங்கள் மூன்று
ஆண்டுகள் வரை பயன்படுத்த முடியும். இயற்கையான முறையில்
மூங்கில் வைத்து தயாரிக்கப்படுவதால் உங்கள் உடல் நலத்திற்கும்
இது மிகுந்த பலனை தரக்கூடியது.

இதில் மூன்று அடுக்குகள் காணப்படுகின்றன. குளிர்ந்த மற்றும்
சூடான உணவுகளை இதில் வைக்க முடியும். இதுதொடர்பான
வீடியோவை வனத்துறை அதிகாரி ஒருவர் ட்விட்டரில் பகிர்ந்துள்ளார்.

இது சமூக வலைதளங்களில் வைரலான பிறகு ஏராளமானோர்
இதனை ஆர்டர் செய்துள்ளனர். அதனால் தானும், தனது நண்பர்களும்
இரவு, பகல் பாராமல் இந்த டிபன் பாக்ஸை தயாரிக்கும் பணியில்
ஈடுபட்டுள்ளதாக இளைஞர் மகிழ்ச்சியுடன் தெரிவித்துள்ளார்.

இதுபோன்ற பொருட்கள் மூலம் சிறு, குறு தொழில்கள்
வளர்ச்சியடையவும் வாய்ப்புள்ளதாக பலரும் கருத்து தெரிவித்துள்ளனர்
-
நியூஸ் 7

மிகவும் அருமையான தகவல் , வாழ்த்துக்கள் ஐயா