பிரான்சில் மீண்டும் ஊரடங்கு அமல் 'பார்ட்டி'களால் வைரஸ் அபாயம்

பாரிஸ்:
பிரான்சில், கொரோனா வைரஸ் பரவல் காரணமாக,
மீண்டும் ஊரடங்கு கட்டுப்பாடுகள் அமல்படுத்தப்பட்டுள்ள
நிலையில், ரகசியமாக நடத்தப்படும், 'பார்ட்டி' எனப்படும்
விருந்து நிகழ்ச்சிகளால், வைரஸ் பரவும் அபாயம் ஏற்பட்டுள்ளது.

ஐரோப்பிய நாடான பிரான்சில், கடந்த, 24 மணி நேரத்தில்,
32 ஆயிரத்திற்கும் மேற்பட்டோர், கொரோனா வைரசால்
பாதிக்கப்பட்டனர்.

கட்டுப்பாடு

இதையடுத்து, நாட்டில் வைரசால் பாதிக்கப்பட்டோரின்
எண்ணிக்கை, 19.54 லட்சமாக உயர்ந்துள்ளது. பலி எண்ணிக்கை,
44 ஆயிரத்து, 246 ஆக உயர்ந்துள்ளது.

வைரஸ் பரவல் வேகமெடுத்துள்ளதால், நாட்டில் மீண்டும்
ஊரடங்கு கட்டுப்பாடுகள் அமல்படுத்தப்பட்டுள்ளன.

இந்நிலையில், ஊரடங்கை சிறிதும் பொருட்படுத்தாமல்,
தலைநகர் பாரிசில் உள்ள ஒரு வீட்டில், நேற்று முன்தினம் இரவு,
ரகசியமாக, 'பார்ட்டி' நடந்தது. இதில், 300க்கும் மேற்பட்டோர்
பங்கேற்றனர்.

இதில், சுகாதார விதிமுறைகளும் மீறப்பட்டது தெரியவந்தது.
இந்த பார்ட்டி, சமூக வலைதளத்தில், நேரலையில் ஒளிபரப்பானது.
இதையடுத்து, தகவல்அறிந்து சம்பவ இடத்திற்கு விரைந்த
போலீசார் மீது, அங்கிருந்தோர், 'பாட்டில்' களை வீசி தாக்குதல்
நடத்தினர். வேறு வழி இல்லாததால், கண்ணீர் புகை குண்டுகளை
வீசி, அந்த கூட்டத்தை போலீசார் கலைத்தனர்.

அறிவுறுத்தல்

இந்நிலையில், அந்த பார்ட்டியில் பங்கேற்ற ஒருவருக்கு,
வைரஸ் இருப்பது நேற்று உறுதிபடுத்தப்பட்டது. இதையடுத்து,
அந்த பார்ட்டியில் பங்கேற்ற அனைவரும், மருத்துவ
பரிசோதனைகளை செய்துகொள்ளவும், வீட்டில் தனித்து
இருக்கும்படியும் அறிவுறுத்தப்பட்டுள்ளது.

ஊரடங்கு கட்டுப்பாடுகளை மீறி நடத்தப்படும், இதுபோன்ற
ரகசிய பார்ட்டி களால், வைரஸ் பரவும் அபாயம் ஏற்பட்டுள்ளது.
-
தினமலர்