டாஸ்மாக் கடைகள் நேர மாற்றம் அமல்: தகவல் தெரியாமல் காலையில் குவிந்த குடிமகன்கள்;

-
சென்னை:
டாஸ்மாக் கடைகள் நேற்று முதல் மதியம் 12 மணிக்கு திறக்கப்பட்டு இரவு 10 மணிக்கு மூடப்பட்டது. நேர மாற்றம் தெரியாமல் காலை 9 மணிகே கடைகள் முன்பு குவிந்த குடிமகன்களால் பரபரப்பு ஏற்பட்டது.

தமிழகத்தில் கொரோனா ஊரடங்கில் அரசு பல்வேறு தளர்வுகளை அறிவித்து வருகிறது. அதன்படி, மே மாதம் 7ம் தேதி டாஸ்மாக் கடைகளை திறக்க அரசு உத்தரவிட்டது.

அப்போது சென்னை நீங்கலாக தமிழகம் முழுவதும் 3,700 கடைகள் முதல் கட்டமாக திறக்கப்பட்டது. காலை 10 மணியில் இருந்து மாலை 5 மணி வரை என கடைகள் செயல்படும் நேரம் அறிவிக்கப்பட்டது.

இதைத்தொடர்ந்து, எந்தவித முன்அறிவிப்பும் இன்றி கடைகள் செயல்படும் நேரம் இரவு 7 மணி வரையில் நீட்டிக்கப்பட்டது. சென்னையில் டாஸ்மாக் கடைகள் திறக்கப்பட்ட பிறகு காலை 10 மணி முதல் இரவு 8 மணி வரை கடைகள் செயல்படும் என அறிவிக்கப்பட்டது.

இந்தநிலையில், நேற்று முன்தினம் ஒருமாதம் ஊரடங்கை நீட்டித்து அரசு அறிவிப்பு வெளியிட்டது. இதேபோல், டாஸ்மாக் கடைகள் செயல்படும் நேரத்தையும் பழைய நடைமுறைக்கே மாற்றி அமைத்தது.

அதன்படி, காலை 10 மணிக்கு பதிலாக மதியம் 12 மணியில் இருந்து
இரவு 10 மணி வரையில் டாஸ்மாக் கடைகள் செயல்படும் என அரசு
அறிவித்தது.

இந்த அறிவிப்பை தொடர்ந்து நேற்று முதல் தமிழகம் முழுவதும் இந்த நேர மாற்றம் அமலுக்கு வந்தது. ஆனால், நேரமாற்றம் குறித்து தெரியாத குடிமகன்கள் பலரும் காலை 9 மணிக்கே டாஸ்மாக் கடைகளின் முன்பாக மதுவாங்க குவியத்தொடங்கினர்.

நேற்று ஞாயிற்றுக்கிழமை விடுமுறை தினம் என்பதால் வழக்கத்தை விட கூட்டம் அதிகமாகவே காணப்பட்டது. சென்னை, மதுரை, திருச்சி மண்டலங்களில் உள்ள கடைகளில் நீண்ட வரிசையில் நின்று மதுவாங்கிச்சென்றனர்.

சில இடங்களில் தள்ளுமுள்ளு ஏற்பட்டது. இதனால், சிலமணி நேரம் அங்கு பரபரப்பு ஏற்பட்டது. கூட்டத்தை கட்டுப்படுத்த எந்த வித ஏற்பாடும் செய்யப்படவில்லை. நேற்று வழக்கத்தை விட மதுவிற்பனை அதிகமாகவே இருந்தது.

அதாவது நேற்று ஒரே நாளில் மட்டும் ரூ.110 கோடிக்கு
மதுவிற்பனை நடைபெற்றிருக்கலாம் எனவும் ஊழியர்கள்
தெரிவித்தனர்.


தினகரன்