அமெரிக்க தமிழர் விளக்கு விருதுக்கு கலாப்ரியா, பேரா.பஞ்சாங்கம் தேர்வு

-
திருநெல்வேலி: அமெரிக்க தமிழர்களின் விளக்கு விருதுக்கு கவிஞர் கலாப்ரியா, பேராசிரியர் க.பஞ்சாங்கம் தேர்வு செய்யப்பட்டுள்ளனர்.

அமெரிக்க வாழ் தமிழர்களின் விளக்கு இலக்கிய அமைப்பு ஆண்டுதோறும் புதுமைப்பித்தன் நினைவாக கலை - இலக்கியத்தில் சிறந்த பங்களிப்பாளர்களுக்கு விருது வழங்குகின்றனர். ஏற்கனவே விளக்கு விருது சி.சு.செல்லப்பா, பிரமிள், பூமணி, தேவதச்சன் உள்ளிட்ட சிறந்த படைப்பாளிகளுக்கு வழங்கப்பட்டுள்ளது.கடந்த சில ஆண்டுகளாக ஒரே ஆண்டில் இருவருக்கு வழங்குகின்றனர்.

2019 ஆண்டுக்கான விளக்கு விருது தேர்வு குழு உறுப்பினர்கள் எழுத்தாளர் திலகவதி, பேரா.சு.சண்முகசுந்தரம், கவிஞர் சமயவேல் ஆகியோர் கவிஞர் கலாப்ரியா, பேராசிரியர் க.பஞ்சாங்கம் ஆகியோரை விருதுக்கு தேர்வு செய்தனர்.

திருநெல்வேலியை சேர்ந்த கவிஞர் கலாப்ரியாவின் இயற்பெயர் சோமசுந்தரம். 1950ல் பிறந்தவர். இவரது முதல் கவிதை தொகுப்பு வெள்ளம் 1973ல் வெளியானது. 40 நுால்கள் எழுதியுள்ளார். 2017 ல் வெளியான வேனல் நாவல் வரவேற்பை பெற்றது. தற்போதும் குற்றாலம் மக்களின் வாழ்வை புனைவாக்கி பேரருவி என்னும் நாவலை எழுதிவருகிறார்.

வங்கியில் பணியாற்றி ஓய்வுபெற்றவர்.பேராசிரியர் க.பஞ்சாங்கம், விருதுநகர் மாவட்டம் ராஜபாளையம் அருகே புத்துாரில் 1949ல் பிறந்தவர். மதுரை தியாகராசர் கல்லுாரியில் தமிழ் இலக்கியம் பயின்றவர். 1973ல் புதுச்சேரி அரசில் கல்லுாரி பேராசிரியராக பணியை துவக்கி 2011ல் ஓய்வுபெற்றவர். தற்போதும் புதுச்சேரியில் வசிக்கிறார். கவிதை, நாவல், மொழிபெயர்ப்பு, திறனாய்வு என தமிழ்இலக்கியத்தின் சிறந்த படைப்பாளியாவார்.

இருவருக்கும் விருதும் தலா ஒரு லட்சம் ரூபாயும் வழங்கப்படுகிறது. விருது தேதி, இடம் பின்னர் அறிவிக்கப்படும் என தெரிவிக்கப்பட்டுள்ளது.

தினமலர்