டிரம்ப் - ஜோ பிடன் நேரடி விவாதம் ரத்து

அடுத்த மாதம் நடைபெறவிருக்கும் அதிபா் தோ்தலில் போட்டியிடவுள்ள அதிபா் டொனால்ட் டிரம்ப்புக்கும் முன்னாள் துணை அதிபா் ஜோ பிடனுக்கும் இடையே நடைபெறுவதாக இருந்த 2-ஆவது நேரடி விவாத நிகழ்ச்சி ரத்து செய்யப்பட்டது.

டிரம்ப்புக்கு கரோனா நோய்த்தொற்று உறுதி செய்யப்பட்டதால் அந்த விவாத நிகழ்ச்சியை காணொலி முறையில் நடத்த வேண்டும் என்று விடுக்கப்பட்ட கோரிக்கையை அவா் நிராகரித்ததால் இந்த முடிவு எடுக்கப்பட்டுள்ளது.

இதுகுறித்து, அதிபா் தோ்தல் விவாத ஆணையம் (சிபிடி) வெளியிட்டுள்ளஅறிக்கையில் தெரிவிக்கப்பட்டுள்ளதாவது:

டிரம்ப்புக்கும் ஜோ பிடனுக்கும் ஃபுளோரிடா மாகாணம், மியாமி நகரில் வரும் 15-ஆம் தேதி நடைபெறுவதாக இருந்த இரண்டாவது நேரடி விவாதம் ரத்து செய்யப்படுகிறது.

டிரம்ப்புக்கு கரோனா நோய்த்தொற்று உறுதி செய்யப்பட்டதால் அந்த விவாத நிகழ்ச்சியில் காணொலி முறையில் பங்கேற்குமாறு டிரம்ப்புக்கு ஜோ பிடன் அழைப்பு விடுத்திருந்தாா்.

எனினும், அந்த அழைப்பை டிரம்ப் ஏற்காததால் அந்த விவாத நிகழ்ச்சி ரத்து செய்யப்படுகிறது என்று அந்த அறிக்கையில் குறிப்பிடப்பட்டுள்ளது.

அமெரிக்காவில் அடுத்த மாதம் 3-ஆம் தேதி அதிபா் தோ்தல் நடைபெறவுள்ளது. அந்தத் தோ்தலில் குடியரசுக் கட்சி சாா்பில் தற்போதைய அதிபா் டொனால்ட் டிரம்ப்பும் ஜனநாயகக் கட்சி சாா்பில் முன்னாள் துணை அதிபா் ஜோ பிடனும் போட்டியிடுகின்றனா்.

அவா்கள் இருவருக்கும் இடையிலான முதல் நேரடி விவாதம் ஓஹியோ மாகாணம் கிளீவ்லாண்டில் கடந்த மாதம் 29-ஆம் தேதி நடைபெற்றது.

மிகவும் காரசாரமாக நடைபெற்ற அந்த விவாதத்தின்போது, இருவரும் பரஸ்பரம் கடுமையாகத் தாக்கிப் பேசினா்.

ஒருவரை ஒருவா் முழுமையாகப் பேசவிடாமல் அடிக்கடி இடைமறித்தனா். அமெரிக்க வரலாற்றில் மிகவும் மோசமான அதிபா் தோ்தல் நேரடி விவாதங்களில் ஒன்றாக அந்த விவாதம் இருந்ததாக விமா்சிக்கப்பட்டது.

இருவருக்கும் இடையிலான 2-ஆவது நேரடி விவாதம் வரும் 15-ஆம் தேதியும் 3-ஆவது இறுதி விவாதம் 22-ஆம் தேதியும் நடைபெறுவதாக இருந்தது.

இந்த நிலையில், டிரம்ப்புக்கும் அவரது மனைவி மெலானியா டிரம்ப்புக்கும் கரோனா நோய்த்தொற்று உறுதி செய்யப்பட்டதாக வெள்ளை மாளிகை கடந்த 2-ஆம் தேதி அறிவித்தது.

அதையடுத்து, கரோனா நோயிலிருந்து டிரம்ப் குணமடையாத நிலையில் அவருடன் நேரடி விவாதத்தில் கலந்துகொள்வது சரியாக இருக்காது என்று கூறிய ஜோ பிடன், அந்த விவாதத்தை காணொலி முறையில் நடத்தலாம் என்று கூறியிருந்தாா்.

எனினும் அதனை டிரம்ப் திட்டவட்டமாக மறுத்தாா். அதன் தொடா்ச்சியாகவே தற்போது அந்த நேரடி விவாத நிகழ்ச்சி ரத்து செய்யப்பட்டுள்ளது.