Latest topics

கவிதைச்சோலை - ஐந்தெழுத்து!

ஈகரை தமிழ் களஞ்சியம் :: கவிதைக் களஞ்சியம் :: ரசித்த கவிதைகள்

Page 1 of 1

கவிதைச்சோலை - ஐந்தெழுத்து!

Post by ayyasamy ram Sat Oct 10, 2020 9:33 am

-
* ஒரு ஐந்தெழுத்து வார்த்தை...
அந்த வார்த்தை எனும்
தண்டவாளத்திலேயே
எல்லாரின் வாழ்க்கை
ரயிலும் ஓடி கொண்டிருக்கிறது!

* அதனால் தான்
உலகம் விடிகிறது...
இயற்கை தன்னை
புதுப்பித்துக் கொள்கிறது!

* சூரிய ஒளியால்
இயற்கை புத்துயிர்
பெறுவது போல —

* ஓடும் நதிகள் யாவும்
சமுத்திரத்தை
அடைவது போல —

* உணவைத் தேடி
எறும்புகள் ஊர்வலம்
தொடங்குவது போல —

*இந்த வார்த்தையை பின்பற்றி
மனிதகுலம் அடிக்கடி தன்னை
உயிர்ப்பித்துக் கொள்கிறது!

* வலிகளும், வேதனைகளும்
ரத்தமும், மரணங்களும்
நிறைந்த வரலாற்றை
தாங்கிக் கொள்ளவும் —

* நிகழ்காலத்தையும்,
எதிர்காலத்தையும்
வலிமையோடு எதிர்கொள்ளவும்
இந்த வார்த்தையே
பயன்படுகிறது!

* மரணத்திடம் மாட்டிக் கொண்டு
போராடுபவர்களுக்கும்,
சோதனைகளால் வருந்துபவர்களுக்கும்,
வேதனையால் துடிப்பவர்களுக்கும்
இந்த வார்த்தையே
வேத வாக்கு!

* தொடர் துன்பங்களால்
இந்த வார்த்தையை
மறந்தவர்கள் உண்டு!

* அவர்களையும் இந்த
வார்த்தை எங்கோ ஒளிந்திருந்து
காப்பாற்றிக் கொண்டிருக்கிறது!

*அந்த வார்த்தைக்கு
அழிவே இல்லை...
அது அழிந்தால்
உலகமே இல்லை!
*அந்த வார்த்தை...
நம்பிக்கை!

— எம்.ஸ்ரீராம், சென்னை.
நன்றி-வாரமலர்

ayyasamy ram: வழிநடத்துனர்; பதிவுகள் : 82826
இணைந்தது : 30/09/2013